مسته‌فا رێبه‌ر: شانۆڤان ب شانۆیێ ده‌وله‌مه‌ند نابیت
ئه‌ڤرۆ، هه‌رهین:
شانوڤانێ گه‌نج مسته‌فا رێبه‌ر، د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: راسته ده‌مێ شێوه‌كار و مۆزیكژه‌ن خواندنا خوه ژ په‌یمانگه‌هێ ب دوووماهی بینن بخوه كاردكه‌ن مۆزیكژه‌ن چ ل ده‌واتان بیت یان شێوه‌كار چ ب شێوه‌كێ تایبه‌ت و ل سه‌ر داخوازیان كاربكه‌ت، به‌لێ شانۆڤان ده‌رفه‌تا وان یا كاری یا كێمه و هه‌كه هه‌بیت ژی چه‌ند هه‌یڤه‌كن دێ كاركه‌ت دووڤ دا دێ مینیته راوه‌ستیایی و گه‌له‌ك جاران ژی كار بۆ مرۆڤی وه‌كو ده‌رفه‌تێ یه و دڤێت مرۆڤ ژده‌ست نه‌ده‌ت، یان هه‌موو شانۆڤان ژی خوه نا هاڤێنه كاری و هه‌موو كاران ناكه‌ن، هه‌كه شانۆڤان یان سینه‌ماكار یێ باش بیت دشێت بزاڤان بكه‌ت كاره‌كێ باش ب ده‌ست خوه ڤه بینیت و ئه‌ڤ چه‌نده ژی دزڤریت بۆ جهێن په‌یوه‌ندیدار كو هاریكار نابن ل گه‌ل شانۆڤانان و بۆچی سێ گرۆپێن شانۆیێ نا دامه‌زرینن بۆ وێ چه‌ندێ ل دهۆكێ چه‌ندین شانۆڤان تێدا كاربكه‌ن و هه‌یڤانه بۆ وان داهاته‌ك ژێ بهێت و باوه‌ردكه‌م ل وی ده‌می شانۆ ل دهۆكێ دێ رۆلێ خوه بینت.
ناڤهاتی گۆت: درامایێ و سینه‌مایێ دا هه‌ر رۆله‌كێ هه‌بیت دشێم ب گێرم، چونكو ده‌مێ مرۆڤ دبیته ئه‌كته‌ر دڤێت یێ خودانشیان بیت و هه‌ر رۆله‌كێ ده‌نه مرۆڤی مرۆڤ ب شێت بگێریت و خوه ل گه‌ل ب گونجینیت، به‌لێ شانۆ ل دهۆكێ گه‌له‌ك یا مریه و پشته‌ڤانی و هاریكاریا وێ گه‌له‌ك یا كێمه و چ بۆ ناهێته‌كرن و هه‌كه ئه‌م ته‌ماشه‌بكه‌ین ل گه‌ل هاتنا ڤایرۆسێ كورونایێ ل هه‌ولێرێ و سلێمانیێ و كه‌ركوكێ باشترین نه‌مایش هاتینه‌كرن، به‌لێ بۆ وان هاریكاری و پشته‌ڤانی بۆ دهێته‌كرن و ل سه‌ر ده‌مێ كۆرۆنایێ ل دهۆكێ بتنێ نه‌مایشه‌ك هاتینه كرن ئه‌و ژی یێ ماموستا (مه‌سعود عارف) بوو كو دوێ شانویێ دا هاریكاری رێڤه‌به‌رێ شانویێ و دیزاینه‌رێ دیكۆری بووم و ئه‌و دووماهی كاربوو من تێدا كاركری
ل دووماهیێ ژی گۆت: مه ده‌رهێنه رو نڤیسه‌رێن و ئه‌كته‌رێن باش هه‌نه و دشیچن شانویان بنڤیسن و وه‌رگێرن بۆ زمانێ كوردی و یا گرنگ ئه‌وه شانول دهۆكێ ژی بهێته كرن و نه راوه‌ستیت، به‌لێ شانۆڤان نه‌شێت ب گێرانا شانۆیان ده‌وله‌مه‌ند بیت، به‌لێ ره‌نگه بشێت ب روح و مرۆڤایه‌تی ده‌وله‌مه‌ند بیت، ئه‌ڤه دده‌مه‌كی دایه هه‌كه شانۆ یا لاواز بیت ژی مه هۆلێن شانۆیێ نینن و بتنێ مه دو هۆل هه‌نه و وه‌كو هۆلا جزیری و یا په‌یمانگه‌ها هونه‌رێن جوان و باوه‌ردكه‌م مه سێ هۆلێن دی ژی هه‌بان و گروپێن شانۆیێ ژی هاتبانه دامه‌زراندن و داهاته‌ك بۆ وان ژێ هاتبا و باوه‌ردكه‌م شانۆ ل دهۆكێ دا بینه‌رێ خوه یێ چه‌ند سالا زڤرینیته ڤه.
