مسر و یونان داخوازا ڤه‌كێشانا هێزێن بیانی ژ لیبیا دكه‌ن
ب، سه‌رجان مه‌حمود:
عه‌بدولفه‌تاح سیسی سه‌رۆك كۆمارێ مسرێ و كیراكۆس میتسۆتاكیس سه‌رۆك وه‌زیرێن یونانێ د په‌یوه‌ندیه‌كا ته‌له‌فۆنی دا په‌یوه‌ندیێن هه‌ر دو ئالیان و ره‌وشا ده‌ریا سپی و لیبیا گه‌نگه‌شه كرن و هه‌ر دو سه‌رۆكێن ناڤهاتی راگه‌هاندن كو ئه‌و د چارچۆڤێ به‌رژه‌وه‌ندیێن هه‌ڤپشك دا هه‌ڤپه‌یمانن و ل ده‌ریا سپی و لیبیا وه‌ك یه‌ك هه‌لویست كار دكه‌ن و ئاشكرا كرن كو دڤێت هه‌موو ده‌وله‌تێن ل ده‌ریا سپی د چارچۆڤێ قانوونێن نێڤده‌وله‌تی دا بزاڤێ بكه‌ن و ژ دروستكرنا ئالۆزیان خوه دوور بكه‌ن.
سه‌رۆك كۆمارێ مسرێ راگه‌هاند كو ئه‌و ل گه‌ل یونانێ و قوبرسێ د ناڤا په‌یوه‌ندیێن ئه‌رێنی دانه و په‌یوه‌ندیێن وان نه ل دژی چو ئالیان دانه و گۆت: (د ڤێ قۆناغێ دا یا گرنگ ئه‌ڤه هه‌موو ده‌وله‌تێن كو سنورێ وێ ل ده‌ریا سپی هه‌نه د ناڤ ئاشتیێ دا و ب گه‌نگه‌شه پرسگرێكان چاره‌سه‌ر بكه‌ن و نابیت چو ئالیه‌ك قانوونێن نێڤده‌وله‌تی بنپێ بكه‌ت، ژ به‌ر كو ئالۆزی و بنپێ كرنێن ل ده‌ریا سپی نه د به‌رژه‌وه‌ندیا چو ئالیه‌كێ دانه).
سه‌رۆك كۆمارێ مسرێ راگه‌هاند ژی كو وان ده‌ست ب بزاڤه‌كا مه‌زن كرینه دا هه‌موو ئالیێن ل لیبیا ل سه‌ر مێزا دانوستاندنان كۆم بكه‌ن و پرسگرێكان ب دیالۆگێ چاره‌سه‌ر بكه‌ن و گۆت: (د ره‌وشا نها دا مه‌زنترین ئاریشه هه‌بوونا هێزێن بیانی و كۆمێن چه‌كدارێن بیانی نه ل لیبیا و ئه‌و یه‌ك مه‌زنترین گه‌فه ل هه‌مبه‌ر قۆناغا دانوستاندنان و بۆ ڤێ چه‌ندێ دڤێت د زووترین ده‌م دا هه‌موو هێزێن بیانی بێی مه‌رج ژ لیبیا ده‌ركه‌ڤن).
سه‌رۆك وه‌زیرێن یونانێ ژی راگه‌هاند كو ئه‌و رژدن د پێشڤه‌برن و بلندكرنا ئاستێ په‌یوه‌ندیان ل گه‌ل مسرێ دا و گۆت: (مسر وه‌ك هه‌ڤپه‌یمانا مه یه ل ده‌ریا سپی و ئه‌م هه‌ر دو وه‌لات ژی هه‌ول دده‌ین ئالۆزیان چاره‌سه‌ر بكه‌ین و سه‌باره‌ت ب لیبیا ژی هه‌لویستێ مه وه‌كو یێ مسرێ یه).
