مـرۆڤ د نـاڤبەرا دو تشتان دا
بەدەل گابێركی
گەلەك ژ مرۆڤان د ناڤبەرا دو تشان دا دهێنە دابەشكرن و ئەڤ دابەشكرنە پتریا جاران ل سەر دەستێ مرۆڤییە؛ ئانكو مرۆڤ بریارێ ددەت بۆ هندێ ئێك ژ وان تشتان بۆ خۆ بهەلبژێریت ب هزاران پەرتووك ل سەر ڤان هەردو تشان هاتینە نڤێسین و گرنگی پێ هاتیەدان، ئەرێ تشتێ بێ بها و ب بها چ گرنگیا خۆ بۆ تە هەیە وەكی كەس تو چەند دەمێ خۆ ددەیە ڤان هەردو تشتان؛ گەلەك مرۆڤ هەنە چ جاران رۆناهیێ نابینن و ب چاڤن ژی، چونكی یێن ل دویڤ هندەك تشان كەفتین كو چاڤێن وان ب تەمامی تاریكرینە و ناهێلن بەرەڤ جیهانەكا رۆهن و خۆ بچن.
كەسەك دبێژیت: ژیانا من ل وی دەمی ب زەحمەت بوو و بەر ب تاریاتیێ ڤە چوو دەمێ من كەسەك نیاسی و هەردەم بەرێ من ددا؛ هندەك تشتان كو ل دەڤ وی بهایەكێ زێدە هەبوو. بۆ نموونە وەرە ببینە كافیان یانژی پەیوەندیان ل گەل ژنان دروست بكەین، من ژی گوهێ خۆ دایێ هەمی تشت ب دەست من كەت؛ ژن و ڤەخوارنێن كحۆلی و هەرشەڤ ل كافیان، وەكی كرمەكی كەتنە لاشێ من من هەست پێدكر كو ئەڤ كارێن ئەز دكەم بتنێ دەمبۆراندنە و چ مفایەكی ناگەهینە من و گەلەك جاران من دگۆتە هەڤالێ خۆ دڤێت ئەز دەستان ژ ڤان كاران بەردەم؛ چونكی رۆژ بۆ رۆژێ پتر هەست ب تاریاتیێ و دلتەنگیێ دكەم وی هەردەم دگۆتە من مالا تە ئەڤە چ گۆتنن؛ تو دبێژی هەما ژیان ئەڤەیە هەڤژینا من زارۆكێن من ب تەمامی من هێلابوونە بتنێ، گەلەك جاران ب شەڕ دچووین، بەلێ مخابن نەشیامە خۆ هەتا وی رادەی ژیانا من ب تەمامی وێران بوو رۆژەكێ دگەل ژنەكێ هاتمەگرتن و زیندانكرن و هەڤژینا من خۆ ژ من دابەردان و ئەو ژنا دیتر ژی هاتە بەردان من خۆلی ب سەری خۆ و چەندین مالان وەركر و نوكە د زیندانێ دا مە و من نەڤێت ب دەركەڤم ژی.
گەلەك كەس یێن هەین هۆسا هزردكەن كو بتنێ ئەو كەس دكورەنە ئەوێن چاڤێن وان رۆناهیێ نەبینن، بەلێ ب چ رەنگان هۆسا نینە ل دەڤ من مەزنترین كۆرەبوون ئەو تو رۆناهیا دلێ خۆ ژ دەستبدەی بۆ هندەك خۆشیێن دەمكی بۆ هەر كارەكی بۆ هەر هەلبژارتنەكێ دڤێت مرۆڤ هزار جاران هزرا خۆ بكەت و پاشی ئەنجامێن وی كاری بۆ خۆ دیار بكەت و پاشی بكەت.
من تشتێن ب بها هێلا بوون و دویڤ هندەك تشتان كەفتم كو رێكا وان یا بەرزە و تاریە و چارەنڤێسەكێ خراب پێشكێشی مرۆڤی دكەن یا باش ئەوە مرۆڤ ل بەر خۆشتڤیێن خۆ رابوەستیت نەهێلیت رۆندك ژ چاڤێن وان بهێنە خوارێ من وەنەكر ئەو رێكا من گرتی دوماهیا وێ شەرمزاری بوو و ئەو تشتێ بێ بها ئەز باش رەزیلكرم، چونكی ل سەر من زال ببوو.
ئەو دەمێ من دیتی زارۆكێن من یێن گازی دكەنە من و ئەز نەشێم چ بۆ بكەم ئەو دەمێ هەڤژینا من هزار نەفرەت ل من كرین ژنوی من زانی من تشتەكێ گەلەكێ ببها ژ دەستدا بۆ تشتەكێ بێ بها ئەز وەكی وی كەسی لێهاتم دەمێ ئەلماس د دەستێ كەسەكی دابیت و ئەو بچیت ل دویڤ پیساتی بگەریت ل دوماهیێ من ئەلماسێ خۆ ژدەست دا و پیساتی بۆ قەدەرا من.
تژی دلێ من رۆناهی بوو تژی لێڤێن من گرنژی بوو و تاریاتیێ گازی دكرە من هەتا ئەز د ناڤ خۆدا بەرزەكریم.
هیڤیا من ئەوە كو چ كەس وەكی من نەكەن هشیاربن دبیت روودانەك بتنێ بەس بیت تو هەمی تشتان ژ دەستبدەی وەكی نەدوورە ئێك گۆلە ژیانا تە هەمیێ بدوماهیك بینیت و ب وی تشتێ رازی بە ئەوێ خودێ دایەتە باجا تاریاتیێ كۆرەبوونە و كۆرەبوونەك كو زڤرین وەكی بەرێ چ جاران نەبیت.
چ جاران رۆناهیا خۆ ب تاریاتیێ نەگوهۆرە.
نەهێلە حەزێن تە گولا ژ دەستێن تە بكەنە نێچیرا هستریان.
ل ڤێرە گرنگە هەر ئێك ژ مە باش هزرا خۆ بكەت بۆ هندێ تشتێن ببها و بێ بها ژێكجودا بكەت بۆ هندێ كەسەك بیت بەرهەمدار بیت، نەك دەمێ خۆ ژ دەستبدەت بۆ هندەك بابەتان كو ببنە جهێ نەئارامیا مرۆڤی و شكەستنا مرۆڤی د ناڤ خەلكی دا نابیت ئەم تاریاتیێ بكەینە، بەدیلێ رۆناهیێ یانژی گریێ بكەینە بەدیلێ گرنژینێ.
مرۆڤ ل وی دەمی بهایێن وان كارێن گرنگ و كاریگەر دزانیت دەمێ سەرا تشتەكێ بێ بها ژ دەست ددەت گەلەك جاران مرۆڤ سەرا كۆمكرنا مالێ دونیایێ ئاگەه ژ تشتەكی نامینیت، بەلێ دەمێ نۆژدار دبێژتە مرۆڤی نەخۆشیەكا گران یا هاتیە تە و ژیانا تە یا د مەترسیێ دا ل وی دەمی هندی پارێن مرۆڤی هەین دێ دەتە نۆژداران، بەس دا ساخ بیتەڤە ئاها ئەڤەیە ئەم باس لێ دكەین ئەوژی روحا مرۆڤی ژ پارەیی گرنگترە ساخلەمیا مرۆڤی ژ هەر تشتەكی گرنكترە.
