مـۆبايلا خـوه ژ هـاككـرنێ بپارێزه
پەروین سەلاح:
گرنگترين ئالاڤێ نها ل به‌ر ده‌ست و پترى هه‌ر تشتى ل جيهانێ دهێته بكارئينان، بێ هه‌ڤرك يا بوويه مۆبايل. ل ده‌مێ كارى، ل ده‌مێ بهێنڤه‌دانێ، ده‌مێ د ماندوو، ده‌مێ د ئارام، ده‌مێ ب خه‌م و كه‌يفخۆشى و … هتد كو ئه‌و هه‌موو وار ناهێنه هژمارتن يێن ئه‌م نه‌شێين بێ مۆبايل ب قه‌تينين.
دبيت د نها دا، ئێك قه‌بخازيه‌كا چاوان ب دانيته به‌ر كه‌سه‌كى ب تايبه‌ت نفشێ نها، ب تنێ هه‌كه ب كارنه‌ئينانا مۆبايلێ د ناڤ دابيت، چو پێ نه‌ڤێت سه‌رناگريت، ئانكو مۆبايل يا بوويه پتريا ژيانا مه و گه‌له‌ك كه‌س د ئاماده‌نه ژى مۆبايلێ ل سه‌ر هه‌ر تشته‌كى هه‌لبژێرين بێ هزركرن.
ئاميره‌كێ ژ ڤى ره‌نگى يێ گرنگ يێ ژ هه‌ژى يه گه‌له‌ك كاران ژى ئه‌نجام بده‌ت، ئانكو پێدڤيه ل دووڤ وێ گرنگيێ بيت يا مرۆڤ دده‌تێ، ژ به‌ر هندێ ژى مه‌زنه كۆمپانيێن جيهانێ يێن ڤى وارى بزاڤێ دكه‌ن سالانه باشترين جورێن ڤان مۆبايلان بێخنه بازارى. ژ لايێ خوه ڤه چو پێ نه‌ڤێت تشته‌كێ وه‌سا يێ گرنگ دێ بيته ئارمانجا هاككه‌ران ژى بزانن چ د ناڤ وان مۆبايلان دايه يان ژى چ نه‌بيت پێزانينێن كه‌سى ب مه‌ره‌ما فرۆتنا وان ب كۆمپانيێن ريكلامان يان ژى هه‌ر تشته‌كێ دى يێ ناڤا وان مۆبايلان ب ده‌ست خوه بێخن.
به‌هرا هه‌ره زۆرا ڤان مۆبايلان ب سيسته‌مێ ئه‌ندرۆيد و ئاى ئو ئێس كار دكه‌ن هه‌ر چه‌نده رێژه‌كا كێم ژى نها سيسته‌مێن تايبه‌ت ب خوه ڤه هه‌نه وه‌كو نووترين دانه‌يا شاوميێ، ژ به‌ر هندێ ژى چاڤكێ هاككه‌ران ب ره‌نگه‌كێ ئاشكه‌را يێ ل سه‌ر ڤان هه‌ردو جۆرێن سيسته‌مان. يا پێدڤى يه ل ده‌مێ ب كارئينانێ گه‌له‌ك هشيار بى دا كو ئه‌ڤ پێزانينێن ته يێن گرنگ و وێنه و ڤيديۆيێن ته يێن تايبه‌ت نه‌كه‌ڤنه ده‌ستێ هنده‌ك كه‌سان بۆ مه‌ره‌مێن بازرگانى و شكاندنا ته بكاربينن.
ژ گرنگترين خالێن خوه پاراستن ژ هاككرنێ ئه‌وه كو چو لينكێن نه‌نياس يان جهێ گۆمانێ ڤه‌نه‌كه‌يى هه‌كه خوه ژ كه‌سانێن گه‌له‌ك نێزيكى ته ژى بۆ ته بهێن، هه‌ر چو كه‌س بيت، پێدڤيه ل ده‌ستپێكێ بزانى ژ كيڤه هاتيه و ژێده‌رێ وى لينكى چيه.
تشتێ دى يێ گه‌له‌ك گرنگ ئه‌وه كو چو ئه‌پليكه‌يشنا دانلۆد نه‌كه كو جهێ گۆمانێ بن ب تايبه‌ت ئه‌ڤێن ژ ده‌رڤه‌يى ئه‌پ ستور و پله‌يى ستور، چونكو ئه‌ڤێن د ڤان جهان دا، هه‌تا راده‌كێ زۆر د پاراستى نه، به‌لێ ئه‌ڤێن ژ ده‌رڤه‌يى ڤان عه‌مباران جهێ گۆمانێ نه و پێدڤيه خوه نێزيك نه‌كه‌يى.
يا ژ ڤان ژى گرنگتر ئه‌وه به‌رده‌وام تو ئابده‌يتا بده‌يه مۆبايلا خوه ب تايبه‌ت ئه‌و ئابده‌يتێن گرێدايى سێكيورێتى كو گه‌له‌ك جاران كۆمپانيێن ڤان جۆره مۆبايلان دێ ڤالاهيه‌كێ د سيسته‌مێ خوه دا بينن كو رێكخوشكه‌ره بۆ هاككرنێ، هه‌ر زوو دێ ئابده‌يته‌كێ هنێريت دا رێگريێ ل وێ ئاريشێ بكه‌ت و ب ساناهى چاره بكه‌ت.
ئه‌ڤه چه‌ند رێيه‌كێن گرنگ بوون كو دێ مۆبايلا ته ژ مه‌ترسيا هاككرنێ پارێزيت، به‌لێ د هه‌مان ده‌م دا، دشيان دايه ب رێيا سيمكارتێ مۆبايلێ ژى هه‌مان سه‌ره‌ده‌رى ل گه‌ل ته بهێته كرن ژ به‌ر هندێ ژى وێ ژى به‌رچاڤ وه‌رگره كو ب چو ره‌نگان سه‌ره‌ده‌ريێ ل گه‌ل هژمارێن نه‌نياس نه‌كه‌يى و هه‌كه لينك بۆ ته ب نامێن سيمكارتى ژى هاتن به‌رسڤێ نه‌ده.
