مـەترسـیا پارچـەبوونا سـووریێ هـەیە
مامۆستایەکێ زانکۆیێ ل رۆسیا دیار دکەت، دەستێوەردانێن وەلاتێن دەرڤە کو هەر یەک ژ وان ژی دڤێت سووریا نوو ل سەر بنەمایێ بەرنامێ وان بیت مەترسیەکا مەزن بۆ پاشەرۆژا وی وەلاتی دروست دکەت و ئەو یەک دشێت ببیتە ئەگەرێ پارچەبوونا سووریێ.
ئیقبال دووڕه مامۆستایێ پەیوەندیێن نێڤدەولەتی ل زانکۆیا مۆسکۆ راگه‌هاند، کو هه‌م ئه‌مریکا و ئسرائیل هه‌م ژی فره‌نسا و تورکیا بەرنامێن خوە یێن جودا جودا بۆ پاشەرۆژا سووریێ هەنە، راستە هەموو بەحسێ ئارامیا ل سووریێ دکەن، لێ بەرنامێ وان وەکو ئێک نینە، ئانکو هەر وەلاتەکێ ل گۆر بەرژەوەندیێن خوە سووریایەک نوو دڤێت، ئەو یەک ژی مەترسیەکا گەلەک مەزن بۆ پاشەرۆژا سووریێ دروست دکەت، چونکی بەرنامەیێ هەر وەلاتەکێ ل گەل یێ دی ناکۆکە و گۆت: (ئەمریکا دڤێت ل سووریێ ئارام هەبیت و نها پشتەڤانیێ ل سیستەمەک ناڤەندی دکەت، ئەو یەک د بەرژەوەندیا ئسرائیلێ دا نینە، چونکی ئسرائیلێ نەڤێت چو دەولەتێن بهێز ل سووریێ دروست بن، ئسرائیل پشتەڤانیێ ل وەلاتەک نە ناڤەندی و لاواز دکەت، ل ئالیێ دی فرەنسا و تورکیا ژی بەرنامەیێن جودا بۆ سووریێ هەنە، ئەو یەک ژی دشێت مەترسیەکا مەزن بۆ پاشەرۆژا وی وەلاتی دروست بکەت).
مامۆستایێ زانکۆیێ ل رۆسیا ئەو یەک ژی دیار کر، ئاخڤتنێن بەری دەمەکێ یێ نوونەرێ سەرۆکێ ئەمریکا بۆ کاروبارێن سووریێ گەلەک ئاریشە دروست کرن، چونکی ژ بۆ ئەمریکا گرنگە جارێ ل سووریێ ئارام هەبیت و وان دڤێت کوردان و دورزیان ژی رازی بکەن، لێ تشتێ ئەو ژ بۆ کوردان و دورزیان دبێژن بێگومان نابیتە ئەگەرێ چارەسەریێ، چونکی هەتا کورد نەگەهنە مافێن خوە رەوشا سووریێ ژی ئارام نابیت، سیاسەتا نها یا ئەمریکا ژ بۆ سووریێ د بەرژەوەندیا کوردان دا نینە و بێگومان کورد ژی ژ سیاسەتا ئەمریکا رازی نینن و گۆت: (هەتا نها ژی دیار نینە کا بەرنامەیێ ئەمریکا ژ بۆ سووریێ ب دروستاهی چیە، ئەو ل ئالیەکێ دبێژن سووریایەک ناڤەندی، ل ئالیێ دی بەحسێ مافێن گەلێ کورد دکەن، دبێژن دڤێت هەسەدە ژی ببیتە پشکەک ژ لەشکرێ سووریێ، لێ چو ئالیەتەک ژی دیار نەکرینە، سیاسەتا نە زەلال یا ئەمریکا سەبارەت ب سووریێ و ل ئالیێ دی سیاسەتا تورکیا یا کو ب هەموو رەنگەکێ ل دژی مافێن کوردانە، دشێن ببنە ئەگەرێ ئالۆزی و هەتا پارچەبوونا سووریێ ژی).
ناڤهاتی د دووماهیا ئاخڤتنا خوە دا ئەو یەک ژی نەڤەشارت د دەمەکێ دا کو تورکیا بەحسێ چارەسەرکرنا پرسا کوردی دکەت، دڤێت سیاسەتا تورکیا ل هەمبەر کوردان سووریێ ژی سیاسەتا باش بیت، چونکی هەکە تورکیا بڤێت قووناغا ئاشتیێ سەرکەڤیت دڤێت دژبەریا مافێن رەوا یێن گەلێ کورد ل سووریێ نەکەت.
