مفایێن خوانـدنا پەرتـووكان
رەمەزان ئیسماعیل گەرەگوهی
خواندنا پەرتووكان بۆ مرۆڤی ئێك ژ پێدڤیێن ڤی سەردەمی یە، ئانكو چەوا جەستەیێ مرۆڤی پێخەمەت ساخلەمی و هەبوون و مان و ژیانكرنێ یێ پێدڤی ب خوارن و ڤەخوارنێ و وەرزشێ و چاڤدانێ یە و نەشێت بێی وان بەردەوامیێ ب ژیانێ بدەت، ئەها وەسا مەژیێ مرۆڤی ژی سەخمەراتی بهێزبوون و گەشەكرن و وەرار و خوە چالاككرنێ ژ بۆ هزركرنەكا بەردەوام و ساخلەمیەكا باش یێ پێدڤی ب خواندنا پەرتووكایە، خوە چەكداركرن ب ڕێكا وەرگرتنا زانین و زانستان وخوە كاركرن ب ڕەوشەنبیریەكا ل وی ئاستی كو مرۆڤ بشێت خزمەتەكا باش بۆ مللەتێ خوە و مرۆڤاتیێ بكەت و مەلەڤانیا ل گەل ئاراستە و پێلێن پێشڤەچوون و جیهانگێریا ڤی سەردەمی دا بكەت هەموو ب ڕێكا پەیداكرنا كلتۆرەكێ توكمە و موكومێ خواندنێ، نەخاسمە خواندنا پەرتووكان ب دەستڤەدهێت. هەژی گۆتنێ یە بێژین: پەرتووك دشێت مرۆڤی بكەتە كەسەكێ ڕەوشەنبیر و زانا و تێگەهەشتی و… هتد، ئانكو پەرتووك مرۆڤی فێری گەلەك سەخلەتێن بەرز و بلند و باش دكەت، مینا نەرمی و لێبۆرینێ و هاریكاریێ و ڕاستگۆییێ و دیسان ب ڕێكا خواندنا پەرتووكێ مرۆڤ دشێت بەرسینگێ هەموو نەخۆشی و هەژاری و پاشكەفتنا بگریت و هەموو ئاریشە و گرفتێن خوە چارەسەر بكەت. دهێتە گۆتن: هەكە تەبڤێت ئاستێ زانستی و هشیاریا مللەتەكی بزانی بەرێ خوە بدە هژمارا پەرتووكخانە و خواندەڤانێن وی و هەبوونا پەرتووكا و پەرتووكخانەیان ژی نیشان و گرۆڤێن هەبوونا ڕەوشەنبێریێ و پێشڤەچوونا مللەتانن.
ژبەرگرنگیا خواندنێ نەخاسمە ب ڕێكا پەرتووكێ دبێژن: (پەرتووك باشترین و ب مفاترین هەڤالێ مرۆڤی یە) و باشترین هۆیێ فێركرنێ یە، لەورا پێدڤیە ل سەر مە هەموویان ئەم گرنگیەكا مەزن و ژ هەژی بدەینە پەرتووكا و خوە ژێ دوور نەكەین و هەردەم هەڤالێن وێ بین و دگەل دا بژین، دا كو مفای بۆ خۆ ژێ وەربگرین و دژیانا خۆدا بكاربینین. گۆتنەكا هەی دبێژیت: پەرتووك باخچەیێ زانایانە، ئانكو كەسێن پەرتووكا دخوینن ڕەوشەنبیر و زانا خوە دناڤ ڤی باخچەی دا ببینن و خوە ب پێزانین و زانستان كاربكەن و جڤاكێ خوە پێ ئاڤابكەن و پێشڤەببن و هەموو تاكێن جڤاكی بزاڤ و پێكۆلان بكەن كو ڕۆژ بو ڕۆژێ پەرتووكخانە و جهێن خواندنێ پتر لێبكەن.
