مفایێن رۆژیێ بۆ ساخلەمیا مرۆڤی
ئەڤرو نیوز ، نەوزاد زادە ھلۆری:
رۆژی ئێکە ژ وان کریارێن ھەری گرنگ د ژیانا مرۆڤی دا کو ھەر تنێ راکرنا فەرزا خودایی و تێھن و برس نینە ، بەلکو کومەکا مفایێن ساخلەمیێ ھەنە ، ھاریکارەکێ نوژداری ددەتن دیارکرن کو برس و تێھنی وەکو نوژدارەکێ چاڤدێریا لەشێ مرۆڤی دکەت.
“غەریب عەبدولکەریم ” ھاریکارێ نوژداری و رێڤەبەرێ بنگەھێ نەخۆشخانا ئەڤریکێ ل دھوکێ بۆ ئەڤرو نیوز گۆت: (رۆژی دەرفەتەکا مەزنە بو گوھرینا خانەیێن لەشی و گەلەک ڤەکولینان دوپاتی ل وێ یەکێ کریە کو راگرتنا خوارنێ بو دەمەکێ دبیتە سەدەم کو خانەیێن لەشێ مرۆڤی جارەک دن نوو ببن ڤە ، و دیسان رۆژی دبیتە سەدەم کو ئاستێ شیانێن لەشێ مرۆڤی بلند ببن و خروکێن سپیێن خووینی نوو ببن ڤە و ھەموو ئەو خروکێن کەڤن ژی نەمینن ، رۆژی دبیتە سەدەما نەھێلانا ژەھرێ دناڤا لەشێ مرۆڤی دا و بەرمایک و ماددەیێن کیمایێن لەشێ مرۆڤی دەردئێخیت ، ھەروەسا دبیتە سەدەما ب ھێز و کاراکرنا مێشکێ مرۆڤی و ئەو خوینا کو دلەشێ مرۆڤی دا ھەیە بو مێشکی پالددەت و مێشک ب ھێز دکەڤیت )
ناڤبری ل بارا تێھنیبوونێ گۆت: (ئەگەر مرۆڤ تێھنی بیت د لەشێ مرۆڤی دا جورە ھورمونەک درۆست دبیت دبێژنێ ADH کو ئەرکێ وی ئەوە ئاڤا لەشێ مرۆڤی زیندان دکەت و ژیراتیا مرۆڤی ژی ب ھێز دکەت و دبیتە سەدەما وێ یەکێ کو بیردانکا مرۆڤی بلەز کار بکەت و کەسەکێ بیرتیژ بیت ، ھەردیسان دبیتە سەدەما کونترولکرنا رێژا شەکرێ و قەلەویێ و فشارا خوینێ)
