مفتا به‌ختی
عارف حیتۆ
مفتا به‌ختی..
خوه د به‌رویكا گه‌نجه‌كێ ئیمۆدا ڤه‌شارت بوو
ئه‌ڤه حه‌فت ساله ئه‌و گه‌نجه
ل هیڤیا كاروانێ حه‌جیان
كو بێت و ئاڤا زه‌مزه‌مێ ژێڕا بینیت
ئه‌ڤه حه‌فت ساله ئه‌و گه‌نجه
ژ دلمرازی، هه‌ڤژیه‌كا خوه دئه‌ڤینیت
دیدارێن عه‌شقێ كت كت بوون
بوونه جۆت و بوونه زنجیر
رۆژ بۆ رۆژێ ژیانێ ب رێكا دكه‌نینیت
ئه‌ڤه حه‌فت ساله ئه‌و گه‌نجه
یێ رێكه‌كێ ب خه‌ونا دهونیت
كو مێڤانه‌ك ئاشۆپی متیێ بدڕینیت
موعجیزه‌كێ بۆ ڤه‌ژینیت ژ ئاسمانێ دوور
ده‌رازینكێن هه‌دار نه‌مای
ته‌ڤ شوسته‌یێن ره‌ق و هشكبووی
د رێكا هونی دا بكه‌ت هه‌ڤیر
دلبه‌را وی، ل نۆرینگه‌كا لا كولانان
ب سێ وه‌ره‌قان كچینیا خوه زڤڕانده‌ڤه و
د گه‌ل گه‌نجه‌كێ كه‌نه‌دی چوو
ئاسمانی ده‌ر بۆ گرنژاند
ده‌ریایێ دیتنه‌ك بۆ نژاند
هه‌موو خه‌ونێن هه‌لاویستی
كرنه د تووركێ قه‌ده‌رێ دا و د گه‌ل رۆژێ
كه‌فته سه‌ر ڕێیا بێ ئابروو
حه‌فت سالێن دی
ئه‌وی گه‌نجێ ترۆمایی ژ ئه‌ڤینیێ
ل قۆلاچه‌كا مزگه‌فتێ كه‌فتبوو شینیێ
شیره‌تان خوه د چاڤان پێچا و
ریه ب دێمی دا شۆركرن
هه‌می مال و مولكێ بۆ مای
عه‌مامه‌ك و دشداشه‌ك تا سه‌ر گوزه‌كان
ئوو ده‌سته‌كێ تزبی یێن باش
پێ بهه‌ژمێریت ته‌ڤ سه‌ربۆرێن فهێتیێ
وه‌همه‌كێ خوه دادا سه‌ر وێ رێكا هونی
ب میناكێ به‌دبه‌ختیێ
ئوو مفتا به‌ختی د پاخلێ دا نه‌بێزاربوویی
هێشتا یا مایه ل هیڤیێ!
*
بلووره‌كا مشتی ئه‌ڤین
چك ل ئاهه‌نگێ راوه‌ستا و ده‌نگ ژێ په‌شین
هه‌ر گه‌نجه‌كێ هێشتا تۆزێ نه‌دادایه مژیلانكا
روویێ یارا خوه ماچكر و هیڤیه‌كا هه‌لاویستی
ب سینگێ خه‌ونێ ڤه كولاجكر
هه‌ژار و ده‌وله‌مه‌ند پێكڤه
داجریان قادا سه‌مایێ و ده‌ڤ بسترین
هه‌ر چ خه‌ما ڤه‌شار هه‌بوو
ژ خه‌لوه‌تگه‌هێن خوه ڤه‌ره‌ڤین، بوونه ئه‌لهۆ
ل هنداڤ خه‌ونێن كه‌سك دفڕین
هه‌كو ئاهه‌نگێ شاپه‌ڕێن خوه داداین و
متبووین گۆپال
هه‌می تێكدا ب ده‌ستێن به‌تال، زڤڕینه مال!
*
ئه‌وی گه‌نجێ ئیمۆ.. بلووره‌كا شكه‌ستی ڤێ بوو
نه چو ئاواز ما بوونه ل بیرا وی و
نه چو په‌یڤ بوونه نێچیرا تیرا وی
هه‌ر له‌یزۆكا ل سه‌ر ڕێ بوو، ئه‌و یێ لێ بوو.
*
