ملله‌ته‌كێ سه‌یر!
ئه‌میر ئه‌ترووشى
ئه‌م ملله‌ته‌كین، هه‌رده‌م ل كافێیان نارگیله د ده‌ڤێ مه‌دایه و به‌حسێ ڤى و وێ هه‌نێ و حوكمه‌تێ دكه‌ین و تانێ ل سه‌رۆكى و وه‌زیرى و رێڤه‌به‌ر و به‌رپرسا دده‌ین و چو بزاڤێن پێشكه‌فتنا خوه و وه‌لاتى ناده‌ین و مه….. وه‌لاته‌كێ وه‌كو ئه‌مریكا و كه‌نه‌دا، دڤێت ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، ب شه‌ڤ و رۆژ نه‌فره‌تان ل گرانیا بهایێ كه‌لوپه‌لێن خوارنێ دكه‌ین و پشتى ئه‌م دكرین و دخۆین، پتریا وێ خوارنێ دكه‌ینه د ته‌نه‌كا گلێشى و ئه‌م ژ هه‌موو ملله‌تان زێده‌تر خوارنێ دكه‌ینه ته‌نه‌كا گلێشى، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، نه‌فره‌تان ل باژێرڤانیێ دكه‌ین ئه‌وا گلێشى رادكه‌ت و ئه‌م ب خوه ب ده‌ستێن خوه گلێشى دهاڤێژینه سه‌ر جادان و ڤڕێنا مه‌یه و گلێشى د جاما ترۆمبێلێ دا دهاڤێژین، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، نه‌فره‌تان ل نۆشدار و ئه‌ندازیار و به‌لێنده‌ر و به‌رپرس و فه‌رمانبه‌ر و مامۆستایان و هه‌موو ته‌خێن جڤاكى دكه‌ین، و ئه‌م ژبیرا خوه دبه‌ین كو ئه‌م ب خوه هه‌ر ئه‌وین و نه‌فره‌ت بۆمه دزڤرن و چ خێزان نینن ئێك ژ وان تێدا نه‌بن، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، باوه‌رنامێن پرۆفیسۆران ل سه‌ر جادا ب رێزكرینه و مۆچه‌یێن وان ژى زێده‌تر سێ ملیۆن دینارانه، به‌لێ ب درێژاهیا سالێ و ب درێژاهیا ژیێ خوه پرۆفیسۆرێن مه ئێك داهێنان ژى ناكه‌ن، ب تنێ دێ وێ كه‌ن یا مۆچێ وان پێ زێده دبیت، ئه‌و ژى چێكرنا ڤه‌كۆلینایه، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، هه‌رده‌م چاڤێ مرۆڤى ل بنپێكرنا قانوونێ یه و هه‌ر كاره‌كێ نه‌قانوونى د به‌رژه‌وه‌ندا مرۆڤى دا بیت دێ ب هه‌موو رێیان بده‌ستخوه ڤه‌ئینیت و هه‌ر جۆره‌كێ واسته‌كاریێ هه‌بیت دێ بۆ خوه كه‌ت، به‌لێ ده‌مێ واسته‌كارى یان بنپێكرنا قانوونى ل سه‌ر وى دهێته كرن دێ نه‌فره‌تان ل ملله‌تى و حوكمه‌تێ كه‌ت، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، ده‌مێ پێ ل قانوونا هاتنوچوونێ دادنین، دێ ده‌ست ده‌ینه ته‌له‌فۆنێ و واسته‌یێ بۆ لادانا وى سزاى كه‌ین و ده‌مێ ل ئه‌ورۆپا دژین ل سه‌ر دفنا خوه دێ وێ قانوونێ بجهئینین و دێ هه‌رده‌م ژى بێژین مانێ قانوون ل ئه‌ورۆپا یا هه‌ى و ل كوردستانێ نینه، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، هه‌رده‌م چاڤێ مه ل زێده‌كرنا مۆچه‌یانه و وه‌رگرتنا پاداشتایه و ب چو ره‌نگان چاڤێ مه ل به‌رهه‌مى نینه و مه یا ژبیركرى كو ل سه‌ر مه پێدڤیه داهێنانێ بكه‌ین و به‌رهه‌مه‌كێ باش بۆ وه‌لاتێ خوه دابین بكه‌ین و شیانێن خوه ب مه‌زێخین بۆ خزمه‌تكرنێ و ئه‌م داخوازا گه‌له‌ك مافان دكه‌ین و ئه‌ركێن ل سه‌ر مللێن خوه ژى بجهنائینین، ئه‌م ب راستى ژى ملله‌ته‌كێ سه‌یرین.
ئه‌م ملله‌ته‌كین، ده‌مێ دچینه پێش یاریا ته‌پاپێ، فایده بین یان خوساره‌ت، هه‌ر تشته‌كێ د یاریگه‌هێ دا دێ شكێنین و هندى ئه‌زمانێ بگریت دێ قه‌سێن كرێت بێژین و ژ یاریێ ده‌ركه‌ڤین، ئه‌م ب راستى ژى ملله‌ته‌كێ سه‌یرین.
