ملله‌ت چاڤه‌رێی خوشبینیه‌كێ یه
ئحسان ئامێدی
دیاره هێشتا گرێ و ئاسته‌نگ و ئالۆزی ل هه‌مبه‌ری پرۆسه‌یا سیاسی ل هه‌رێما كوردستانێ دزۆرن و ملله‌ت خویكا وان دده‌ت.
هه‌رێما كوردستانێ ب خه‌لك و دامه‌زراوێن وێڤه دكه‌ڤیته بن گڤاشتن و گه‌فێن ناڤخوه‌یی و ده‌ره‌كی و سه‌ركردایه‌تیا وێ یا سیاسی و ئیداری ژی د بزاڤ و چالاكیێن به‌رده‌وام دایه بۆ ده‌ربازبوونێ ژ ڤان بارودۆخان، لێ هه‌ر جارا پێنگاڤه‌كێ دچیته پێش هه‌مبه‌ری كۆمه‌كا گرێ و ئاسته‌نگێن دی دبیت، ئێدی ملله‌ت بێزار و بێهنته‌نگ بوویه ژ ڤێ ره‌وشێ و بهیڤییه و چاڤه‌رێ یه ئه‌و گرێ ڤه‌بن و ئه‌و ئاسته‌نگ رابن و ئه‌و ئالۆزی چاره‌سه‌ر بن و خۆشبینیه‌ك چێبیت..
ئه‌ڤه چه‌ندین ساله خه‌لك گێژبوویه و سه‌ودا لێ چوو ب هنده‌ك گۆتنان.. دێ هێت، نه‌هات!، دێ ده‌ن، نه‌دان!، دێ پێكهێن، پێكنه‌هاتن!، دێ هێنه‌كرن، ناهێنه‌كرن، دێ چێبیت، چێنابیت!، دێ خۆش بیت، خۆش نابیت!، ئه‌ڤی ئاڤاكر، یێ دی هه‌ڕفاند!، ڤی چێكر، یێ دی خراپكر!…ئێدی راستگۆیی كه‌فتیه د گومانێ دا و نێزیكه بهێته ژ ده‌ستدان!.
ملله‌تی خه‌بات كریه و قوربانی داینه بۆ ئازادیێ، دخوازیت و دڤێت ئه‌ڤ ئازادیه بمینیت و جێگیربیت، و هێزێن سیاسی ب هه‌ڤرا كار بكه‌ن بۆ پاراستن و گه‌شه‌كرنا هه‌رێمێ و دابینكرنا ماف و پێدڤیێن ملله‌تی.
ملله‌تی ژیان دڤێت، ژیان هه‌بوونه، ل هه‌می بارودۆخان دا، دڤێت ژیانا مرۆڤی یا دابینكری بیت دا سه‌قامگیری چێبیت و گه‌شه‌یێ بكه‌ت.. و هه‌می لایه‌ن دخواستینه ملله‌تی بكه‌نه ئارمانج و گرنگیێ ب پێدڤیێن ژیان و داخوازێن بنه‌كیێن خه‌لكی بده‌ن وپشراست و دلنیاكه‌ن، چونكی ملله‌ت ژێده‌رێ هێز و ره‌وایا هه‌رێمێ و هه‌می لایه‌نایه.
هه‌رێما كوردستانێ وه‌كو هه‌ر ده‌وله‌ته‌كێ ب ئاسایش و سه‌قامگیریێ و دابینكرنا پێدڤیێن ژیانا خه‌لكی بهێزدكه‌ڤیت و خورت دبیت، ئه‌ڤه ئه‌ركێ هێزێن ده‌ستهه‌لاتدار و بریار بده‌سته یا پێدڤی بۆ بكه‌ن، كو دڤێت هه‌می كار و چالاكیێن وان بۆ خزمه‌تا هه‌رێما كوردستانێ بیت.
یا دیاره سه‌ره‌رای كار و رژدی و خۆراگری و پێداگریا سه‌ركردایاتیا سیاسیا كوردستانێ كو خوه د پارتی و سه‌ركردایه‌تیا وێ یا ژیر و خه‌مخۆردا دبینیت، لێ دژاتیا هنده‌ك هێزێن هه‌رێمێ و ئیراقی و ده‌وله‌تێن هه‌رێمایه‌تی وه‌كریه هه‌رێم بكه‌ڤیته به‌ر پێكدادانێن پێچه‌وانه‌ی حه‌ز و ڤیانێن ملله‌تی!.
فره پارتایه‌تیا ساخله‌م ل وه‌لاتی بنگه‌هه‌كێ دیموكراتیه‌تێ یه و هۆكارێ باشتركرنێ و دابینكرنا مافێن تاك و كۆم و پێكهاتانه، لێ ده‌مێ فره‌پارتایه‌تی هه‌لسوكه‌وته‌كێ نه‌ساخله‌م نیشابده‌ت، كێشه ئالۆزتر لێدهێن و سه‌قامگیری دهه‌ژیێت و دبیته مه‌ترسی ل سه‌ر قه‌وارێ وه‌لاتی و ئه‌ڤه پتر ملله‌تی بێزاردكه‌ت، ب مخابنی ڤه ئه‌ڤه بوویه هه‌لسوكه‌وتێ هنده‌ك هێزێن سیاسی و ژێیاتیا خوه یا نه‌ته‌وه‌یی و نیشتیمانی ژبیركریه و كه‌فتینه د به‌ره‌یێ لاوازكرنا هه‌رێمێدا هه‌روه‌كو بو وام ملله‌ت خه‌م نینه!.
دڤێت هێزین كوردستانێ كار بۆ بهێزكرنا هه‌رێما كوردستانێ و بنه‌مایێن حوكمرانیا دیموكراتیێ بكه‌ن، و هه‌می بزاڤێن وانێن ناڤخوه‌یی و ده‌ره‌كی پێناڤی هه‌رێمه‌كا بهێز و سه‌قامگیر بن، نه بۆ پشتقراندن و ده‌ستبادان و لاوازكرن و كرێتكرن و ژناڤبرنا هه‌ڤبن!.
ژ كه‌ڤندا كورد و كوردستانێ دوژمنێن هه‌رێمایه‌تی هه‌نه و هه‌ر وان نه‌ته‌وه‌یێن هه‌رێمایه‌تی كوردستان داگیركریه و د ناڤبه‌را خوه‌دا لێكڤه‌كریه و ریكه‌فتینه كو نه‌هێلن چ بزاڤێن رزگاریخوازێن كوردستانێ ل چ پارچه‌یان سه‌ربكه‌ڤن و كاردانه‌ڤه ل سه‌ر وان سیاسه‌تا بزاڤ و رێكخستنێن سیاسیێن خومالی چێبووینه و ئارمانجێن ده‌ربر ژ ماف و خواستێن ملله‌تی بلندكرینه و هیڤی و ئومێد زیندیكرینه و خه‌بات و تێكۆشین كرینه و گۆری و قوربان داینه تا ئه‌ڤ هه‌رێما كوردستانێ به‌رهه‌مهاتی و ملله‌ت تێدا ئازاد و سه‌رفرازكری، ئه‌ڤرۆ ژی ژ هه‌می لایه‌نه‌كی دهێته خواستن هه‌می شیانێن خوه بێخیته د خزمه‌تا مان و به‌رده‌وامبوون و گه‌شه‌بوونا هه‌رێمێ دا، نه‌مازه كو ده‌وله‌تێن هه‌رێمایه‌تی دانپێدان ب هه‌رێمێ كریه و سه‌ره‌ده‌ریێ دگه‌لدا دكه‌ن سه‌ره‌رای نیازێن وانێن ڤه‌شارتی و ده‌ستێوه‌ردانێن وانێن نه‌ره‌وا و ده‌ستكیسیا هنده‌ك لایه‌نان!.
هۆكاره‌كێ هێزا هه‌رێمێ په‌یوه‌ندیێن هه‌رێمێ و ده‌وله‌تێن هه‌رێمایه‌تی و جیهانی نه كو ب پشته‌ڤانیا ده‌ره‌كی دهێته نیاسین، لێ ده‌مێ ناڤمالیا هه‌رێمێ نه‌یا ئێكخستی بیت و هێزێن سیاسی گوتاره‌كا هه‌ڤگرتی نه‌بیت ئه‌و پشته‌ڤانیی ژی دێ سست و لاواز بیت.
هه‌لبه‌ت ئه‌قلیه‌تا شۆفینیست و تایفه‌گه‌ری رێگره ل به‌رامبه‌ر چاره‌سه‌ریێن بنه‌كیێن دۆزا كوردستانێ، لێ یا خزمه‌تا سیاسه‌تێن وان دكه‌ت ناكۆكیێن ناڤمالیا هه‌رێما كوردستانێ و خۆفرۆشیا هنده‌ك لایه‌نانه.
بارزانیێ نه‌مر و پارتی و سه‌رۆك بارزانی و بزاڤا سیاسی گه‌له‌ك خه‌بات و پێداگیری كریه و ملله‌تی ژی گه‌له‌ك به‌رخودان و خۆراگری نیشادایه هه‌تا ئه‌ڤ هه‌رێمه هاتیه دامه‌زراندن، خۆشبه‌ختانه هه‌رێما كوردستانێ كریه كیانه‌كێ فیدرالیێ ده‌ستووریێ دانپێدای و خوه ل هه‌مبه‌ری ڤان هه‌می كێشه و ئالۆزیان رادگریت و چاڤه‌رێ دكه‌ت ده‌ستپێشخه‌ریێن گه‌شبین بهێنه‌كرن و بارودۆخ به‌ر ب باشتریێ ڤه بچیت و ملله‌ت هه‌ر ب هیڤی و چاڤه‌رێی خۆشبینیه‌كێ یه.
