ململانێیا د ناڤبەرا سوودانی و مالكی دا بۆ ب دەستڤەئینانا پۆستێ سەرۆك وەزیرێن بهێت گەهشتیە گۆپیتكێ
هەڤدەم ل گەل گەنگەشەیا سیاسی یا گەرم بەری ئەنجامدانا هەلبژارتنێن داهاتی یێن جڤاتا نوونەرێن ئیراقێ ل 11/11/2025، كو هێشتا گەرەنتی نینە ژ ئەگەرێ خرابییا رەوشا سیاسی، ئەمنی، ئابۆری و ڤەكێشانا هێزێن ئەمریكی، بهێنە ئەنجامدان، چارچۆڤەیێ هەماهەنگیێ یا شیعی راگەهاند ئەو یا رژدە حوكمەتا داهاتییا ئیراقێ پێكبینیت، بەلێ دناڤ مالا شیعیدا ململانێیا مانا ویلایەتەكا دی بۆ محەمەد شیاع سودانی و زڤرینا نوری مالكی، سەرۆك وەزیرێن ئیراقێ یێ پێشتر بۆ دەستهەلاتێ، توندتر دبیت.
مالپەرێ (المعلومە) یا ئیراقی ژ زاردەڤێ محەمەد زەیدی، پەرلەمانتارێ چارچۆڤەیێ هەماهەنگیێ ڤەگوهاست» حوكمەتا داهاتی نەشێت ژ دەرڤەی چارچۆڤەیێ هەماهەنگیێ بیت، چونكە تاكلایەنە شەرعییەتا دیاركركرنا سەرۆك وەزیرێن داهاتی هەیە».
بەلێ ئەو ئاخڤتنە د دەمەكی دانە كو مەیدانا سیاسییا ئیراقێ د ناڤبەرا هێزێن جودا جودا دا سەبارەت ب شێوازێ حوكمەتا داهاتی و رۆلێ پێكهاتەیێن سەرەكی د پرۆسەیا سیاسیدا تووشی جودابوونێ بوویە.
ژ بلی وێ چەندێ ب دیتنا هندەك ژ چاڤدێرێن سیاسی ل ئیراقێ، ئەو ململانێیا توند ئەوا كەفتییە دناڤ چارچۆڤەیێ هەماهەنگیێدا، ب تایبەتی پرسا دوبارەبوونا ویلایەتەكا دی بۆ محەمەد شیاع سودانی، یان زڤرینا نوری مالكی، سەرۆك وەزیرێن پێشتر بۆ دەستهەلاتێ، چارچۆڤەیێ هەماهەنگیێ شیعی ئێخستییە پێشبەری هەلوەشاندنێ، چونكە ژ ئالییەكی محەمەد شیاع سودانی د هەلبژارتنێن داهاتیدا سەرۆكایەتییا هەڤپەیمانییەكا بەرفرهە دكەت ب ناڤێ (ئاڤەدانكرن و گەشپێدان)، كو حەفت لیستێن سیاسی بخوەڤە دگریت.
د بەرامبەر دا، هەڤپەیمانییا دەولەتا قانوونێ ژی ب سەرۆكایەتییا مالكی، رەخنێ ل زڤرینا سودانی بۆ پۆستێ سەرۆك وەزیریان دگریت و پێشبینیێ دكەت، سەرۆكێ داهاتی یێ حوكمەتا ئیراقێ ژ رێزێن هەڤپەیمانییا دەولەتا قانوونێ بیت.
چاڤدێرێن سیاسی دبێژن، بەغدا دێ مەیدانا ئێكلاكرنێ بیت د ناڤبەرا سودانی و مالكی دا، ژ بەر كو زۆرترین كورسی كو 70 كورسی نە ژ سەرجەمێ 329 كورسیێن جڤاتا نوونەرێن ئیراقێ، یێن پارێزگەها بەغدایێ نە، بەلێ سەركەفتنا هەر ئێك ژوان (سودانی یان مالكی) دێ پرسا پێكئینانا حوكمەتا داهاتییا ئیراقێ ب جۆرەكی ئالۆز كەت.
