ملپێچ و هێزا خوە پێچانێ ب ئەردی
غیاس خـالد زێباری
دیمەنێ راكێشانا ملپێچا وەلاتیەكێ كوردێ گوندێ شناغە ل سنوورێ كەركووكێ ب ناڤێ محەمەد ئەمین ژلایێ سەربازەكێ ئیراقێ، دەنگڤەدانەكا زۆر ل راگەهاندنێ و سۆشیال میدیایێ دایەڤە و زۆر رامانان ددەت، ل سەر ئاستێ سیاسی ژی جەنابێ سەرۆك بارزانی و سەرۆكێ هەرێما كوردستانێ و سەرۆكێ حوكمەتێ پەیامێن گرنگ و راماندار دەربارەی گەهاندن، و پشتەڤانیا خوە بۆ وان جوتكارێن كورد دەربڕی و ئەو رەفتارا نە مرۆڤانە یا سۆپایێ ئیراقێ ماندەلكر. ئەڤ رەفتارا وی لەشكرێ ئیراقێ و كۆمبوونا وێ ژمارا لەشكری ل دۆر وان جۆتكارێن كورد دیمەندێن دلهەژینن و بەیاننامەیەكا زەلال و نەفەرمیا لەشكرێ ئیراقێ یە، كو ئیراێ چ لەشكرێن نشتیمانی نینە و ئەرێ هەی لەشكرەكێ تائیفی و نەتەوەپەرستیە، چونكی ئەو جۆتیار یێن ل سەر ئەردێ خوە و باب و پاپیرێن خوە كار و كەسابەتا خوە دكەن و قانوونێن ئیراقێ ژی مافێ پشتەڤانیا مافێ بكارئینانێ ددەنێ، لێ ئەڤا دهێتە كرن پشتراستیا بێ دەستهەلاتیا دەولەتا ئیراقێ و ئیدارا پارێزگەها كەركووكێ یە، بەرامبەر هێزێن لەشكری، ئەگەر نە، هێزێن لەشكری چ پەیوەندی ئاریشێن چاندنێ هەیە مادەم دەستوور و قانوون و دادگەه و وەزارەتا چاندنێ هەنە؟.
خوەڕاگری و وێرەكیا محەمەد ئەمینێ جوتیار و هەڤالێن وی و كوردێن وان دەڤەرا چەند پەیامەك گەهاندنە دەستهەلاتا كوردستانێ و ئیراقێ و سازی و رێكخراوێن مافێن مرۆڤ ل سەرتاسەرێ جیهانێ كو تاكێ كورد خوەدی هەستەكا بلندا نشتیمانی یە و هەبوونا وان ب هەبوونا ئاخا كوردستانێڤە یا گرێدایی یە و د بەرهەڤ نینە بن سێبەرا هەمی گەف و شێوازێن تۆنكاریێ و زۆرداریێ دەستا ل ئاخا خوە بەردەن و ل دەڤ وان زۆرا پیرۆزە، مەبەستا وان نە تنێ كێلانا چەند دۆنەمێن ئەردی یە، بەلكی مەبەستا وان ڤیانا كوردستانێ و بەرهەڤبوونە خوینا خوە ل سەر بڕێژن و گیانێ خوە لسەر دانێن، ئانكو كەسێن خوەدی هەستەكا بلندا نشتیمانی و نەتەوەیی نە، ژلایەكێ دیتر پەیامەكە بۆ هەرێما كوردستانێ ب هەمی سازی و ئالیێن سیاسی بێ جوداهی، كو پشتی روودانێن 16 ئكتۆبەرا سالا 2017 هەتا نهۆ مەترسیێن مەزن و رێكخستی ل سەر وێ ئاخ و دەڤەرێن كوردستانێ یێن داگیركری هەنە ژ وانا دووبارەبوونەڤا ئەنفالا ب شێوازەكێ دیتر، رووداوێ لاوازی و تائیفەگەریا دەولەتا ئیراقێ نیشا جیهانێ دا و گۆتە سازی و رێكخراوێن مافێن مرۆڤ ل سەر ئاستێ جیهانێ، ئیراقێ كەركووك كریە سەنتەرێ پێشێكرنا مافێن مرۆڤ و هێزا خوە دژی خەلكێ سڤیلێن كورد بكاردئینن!.
