ملیۆن دارێن زەیتوونان ل ئاكرێ دێ هێنە چاندن
رەمەزان زەكەریا:
پڕۆژەیێ بهارا ئاكرێ ل دەڤەرداریا ئاكرێ دەستپێكریە و ب چەندین قووناغان، ملیۆن دارێن زەیتوونا ل سەنتەرێ باژێری و گوندێن دەردوور دێ هێنە چاندن.
فازل مستەفا، رێڤەبەرێ چاندنا ئاكرێ بۆ ئەڤرۆ گۆت: «پڕۆژەیێ بهارا ئاكرێ دەستپێكریە و ب چەندین قووناغان دێ هێتە ئەنجامدان و ملیۆن دارزەیتوون ل سەنتەرێ ئاكرێ و گوندێن دەردوور دێ هێنە چاندن، بۆ هەر قووناغەكێ هەژمارەكا دارزەیتوونان دێ هێنە چاندن، بڕیاربوو بۆ دەمێ پێنج سالان ڤەكێشیت، بەلێ بزاڤێن باش هاتینە كرن، كو د دەمێ سێ سالان دا پڕۆژە ب دووماهی بهێت و ملیۆن دارزەیتوون بهێنە چاندن».
ناڤبری گۆتژی: «پڕۆژەیێ بهارا ئاكرێ گەلەك یێ گرنگ و مفادارە بۆ ئاكرێ، ژ بەركو دێ بیتە ئەگەر رێژەیا كەسكاتیێ زێدەبیت و سەقایەكێ پاقژ و ژینگەهەكا باش، دیسا بەرهەمێ زەیتوونان، كو بەرهەمەكێ باشە بۆ دروستكرنا زەیتا زەیتوونان دێ زێدەبیت».
ناڤهاتی خویا ژی كر، پڕۆژە دێ بیتە دەڤەرەكا گەشتیاری د چارچوڤێ چاندنا ئێك ملیۆن دارزەیتوونان دا، كارگەهەكا دروستكرنا زەیتا زەیتوونان ژی دێ هێتە دروستكرن، دیسا ژینگەها دەڤەرێ ژی بۆ چاندنا دارزەیتوونان گەلەك یا باش و گونجایە.
