من دڤێت ببمە مۆزیكژەنەكێ پرۆفیشنال
زاخۆ، دلۆڤان هالۆ:
مۆزیكژەنێ گەنج یێ باژێڕێ زاخۆ سەباح ساز د دیدارەكێ دا بۆ ڕۆژناما ئەڤرۆ دیار كر كو ل هەر ل ژییێ زاڕۆكینیێ حەز و ئارەزوویا ژەنینا ئامیرێ مۆزیكێ ل دەف من پەیدا بوویە، لێ ل سالا ٢٠٠٨ من دەست ب ژەنینا ئامیرێ مۆزیكێ كرییە، و من دڤێت د بوارێ مۆزیكێ دا ببمە مۆزیكژەنەكێ پڕۆفیشنال.
ناڤهاتی ئاماژە ب وێ چەندێ ژی كر كو مۆزیك ل دەف من تشتەكێ تایبەتە وەكو ڕۆح و هەناسێ یە و ئەز گەلەك پێ ئارام دبم، و بسپۆریا من یا سەرەكی ژەنینا ئامیرێ سازێ یە لێ ئەز هەر دوو ئامیرێن ئۆرگێ و عۆدێ ژی دژەنم، ئەز ل ستۆدیۆیێ پشكداریێ د تۆماركرنا سترانێن هونەرمەندان دا دكەم و هەروەسا پشكداریێ د ئاهەنگ و شەهیانان دا دكەم، و كارێ من پتر ژ دەرڤەیە.
گۆت ژی:”خێزانا من و دوست و هەڤال و نیاسێن من هەمی هاریكار و پشتەڤانێن منن، و حەز دكەن ئەز ژی وەكو هەر مۆزیكژەنەكێ پێش بكەڤم و بگەهمە ئاستێن بلند”
زێدەتر ژی گۆت:”من ئامیرێ مۆزیكێ بۆ گەلەك هونەرمەندان ژەنییە د تۆماركرنا سترانێن وان دا وەكو عەدنان سالحی و دلشاد زاخۆیی و جادر زاخۆیی سەمیر عەبدوللایی و نزار بابێ هەردەمی، هەروەسان من پشكداری دچەندین كۆنسێرتان دا كرییە ل هەولێرێ و دهۆكێ و زاخۆ”.
