من دڤێت بهلێم و نه‌شێم بێ وى بژيم
ئه‌ڤرۆ نيوز:
کچەکا 25 سالی دلێ خوە بۆ ئەڤرۆ ڤەدکەت و دبێژیت: ئەز قوتابیا زانکویێ مە و ئەڤە بۆ ماوێ 3 سالایە ئەز و گەنجەکێ 26 سالی حەز ژ ئێکدو دکەین، ئەو جیرانێ مەیە، ھەروەسا قووناغا دوازدێ ب داوی ئینایە و یێ بی َکارە، لێ ئاریشا من ئەوە من گەلەک جارا یا گۆتیێ وەرە من بخوازە، لێ ئەو بەھانەیا دگریت و ژ بەر کو دەمێ دەستپێکێ من گۆتیێ وەرە من بخوازە گۆت، ھێشتا برایێ من یێ ژ من مەزنتر ژن نەئینایە و پشتی برایێ وی ژن ئینای دیسا من گۆتێ لێ وی گۆت پارە نینن پاشی گۆتە من دەمێ تو زانکۆیێ خلاس دکەی ھینگێ ئەز دێ ھێم تە خوازم و ئەز باوەر ژ ڤێ ئاخفتنا وی ژی ناکەم، ژ بەر کو ئەوی دەستپێکێ گەلەک حەز ژ من دکر، لێ ئەز وەسا ھەست دکەم کو نوکە حەزژێکرنا وی یا بۆ من کێم بووی و گەلەک خوە ژ من تۆرە دکەت و نزانم بۆچی و ژ بەر چ ئەز پرسیار ژی ژێ دکەم لێ ئەو دبێژیت تو ئەگەرێ تۆرەبوونا منی، سەرەرای ئەو چ داخوازی ژ من بکەت و چ بڤێت ئەز بۆ بجە دئینم، نوکە من دڤێت وی بھێلم بەس ئەز نزانم دێ چەوا ھێلم، ژ بەر کو نەشێم بێ وی بژیم و گەلەک حەز ژێ دکەم و ئەو ژی حەز ژ من دکەت بەس نزانم کا ھێشتا وەکی بەرێ حەز ژ من دکەت یان نە؟
خاتينا هێژا..
ئەم دێ بێژینە تە و ھەمی خواندەڤانا ھەر دەمێ مرۆڤ کارەکی دکەت دڤێت ب مێشکێ خوە بکەت، پاشی لایەنێ خوەیێ سوزداری بەرچاڤ وەرگریت، ئەڤ کەسێ تو بەحس دکەی ئاستێ وی یێ خواندنێ ژ یێ تە کێمترە سەر ھندێرا یێ بێکارە و چەندین جارا تە داخواز ژێکریە بەلێ ئەو بھانا دگریت. وەسا دیارە ئەوی ژ دل تو نەڤێی و بزانە ئەو کەسێ مرۆڤ نەڤێت ھەتا ژیانا ھەڤژینی ژی دگەل بکاربینی دێ تووشی ئاریشان بی و خالەکا دی دبێژیت ھەتا تو زانکۆیێ خلاس دکەی وەسا دیارە ئەو حەز دکەت ژلایێ ئابووری ژی ڤە خوە بھێلتە ب ھیڤیا تەڤە تو کار کەی و دراڤی لێ مەزێخی. تە گۆت من باوەری ب وی نەمایە، ئەگەر ھەر ڤێگاڤێ ئەو خوە دگەل تە تۆرە بکەت، ھزرا خوە بکە دێ چەوا شیێ دگەل کەسەکی ھوسا بژی، بەلێ دگەل ھندێ بریار بۆ تە دزڤریت تو دگەل بمینی یان بھێلی، بەلێ دڤێت تو باش ھزرا خوە بکەی کا کیژ بۆ تە باشترە.
بەرسڤدان، ڤەکولەرێ جڤاکی: عەبدولجەبار عەبدولرەحمان
په‌يجێ دلێ خوه ڤه‌كه ل سه‌ر تۆڕا جڤاكيا فه‌يسبۆكى
