من دڤێت ب رێیا كارێ خوە خزمه‌تا هونه‌ر و مۆزیكا كوردی بكه‌م
زنار تۆڤی:
ره‌وشان چه‌لیكه‌ر، خه‌لكا باژێرێ تاتوانێ یه ل باكورێ كوردستانێ، نوكه ل باژێرێ ئیستانبولێ دژیت، دبێژیت: د ڤان سالێن بوری دا من دناڤا گه‌له‌ك پرۆژه و خه‌باتێن موزیكێ دا كاركرییه، ل سالا 2018 ێ، من ئه‌لبۆما خۆ یا ب ناڤێ « ئاخ لێ وه‌سۆ» ده‌ست ب كارێ خوە یێ سۆلۆیێ كرییه، هه‌روه‌سا ل سالا 2020 ێ، من ئه‌لبۆما خۆ یا ب ناڤێ « تۆڤـــ « به‌لاڤكریه، پار دو ئه‌لبۆمێن سه‌ركه‌فتی كو ژ پێرفۆرمانسێن زندی پێكدهاتن هاتنه به‌لاڤكرن، ڤیدیۆیێن وان ئه‌لبۆمان ب ناڤێ « لایڤ سێشن ڤۆل» 1 و « لایڤ سێشن ڤۆل» 2 خه‌لكێ ب ملیۆنان لێ ته‌ماشه كر، ئه‌ڤه چه‌ندین ساله ئه‌و د بیاڤێ هونه‌ری دا كاردكه‌ت، هه‌تا نوكه وێ چه‌ندین كلیپ به‌لاڤكرینه، هه‌روه‌سا د نوكه دا ئاستێ موزیكا كوردی گه‌له‌ك یێ باشه، ل گه‌ل هندێ نوكه نفشه‌كێ نوو پێ گه‌هشتیه د وارێ موزیك و سترانگۆتنێ دا، ئه‌ز هیڤی دكه‌م، ئه‌و نفشێ نوو بشێن باشتر خزمه‌تا هونه‌رێ كوردی بكه‌ن.
ل گه‌ل كارێ سترانگۆتنێ، ئه‌ز ئامیرێ كه‌مانێ ژی دژه‌نم، هه‌روه‌سا من پشكا ئه‌كته‌رییێ ل زانكۆیێ خواندییه و من پشكداری د چه‌ندین كارێن سینه‌مایی دا كرییه.
ره‌وشانێ گۆت ژی: من ئه‌لبۆمه‌كا نوو ب ناڤێ « هنار» كو ژ 9 تراكان پێكدهێت به‌لاڤكرییه، هه‌موو ستران ژی ژ په‌یڤێن من بخۆنه، پرانیا ئاوازێن وان سترانان ژی من بخۆ چێكرینه، دناڤا وێ ئه‌لبۆمێ دا مژارێن مینا، ئه‌ڤین، هیڤی، ئێش و بێچاری هاتینه به‌حسكرن، د هه‌مان ده‌مدا به‌حسێ هه‌ست و ره‌نگ و ناسنامه و باژێر و رۆلێن كوردان دكه‌ت، ئه‌ز دخوازم مینا دندكێن هنارێ ئه‌م ببینه ئێك و د ده‌مێ دو سالان دا ئه‌ڤ ئه‌لبۆمه هاتییه به‌رهه‌ڤكرن و هه‌تا نوكه من چه‌ندین سترانێن سینگل ژی به‌لاڤكرینه.
گۆت ژی: ئاره‌نجه‌یا ئه‌لبۆمێ ژ لایێ ئینسترۆمانیست هاكان گۆربازی ڤه هاتییه چێكرن، هه‌روه‌سا چه‌ندین موزیكژه‌نێن خۆدان شیان ب موزیكا خوە یا ره‌نگین كار د ئه‌لبۆما من یا نوو دا كرییه، هه‌روه‌سا ئه‌ز د كۆنسێرتێن خوە دا هه‌ستێن كوور یێن به‌رهه‌ڤبوویان رادكه‌ته سه‌ر پێیان و سه‌مایێ دكه‌ن، هه‌روه‌سا من چه‌ندین ئاهه‌نگ و كۆنسێرت ل ده‌ڤه‌ر و باژێرێن جودا ئه‌نجامداینه و من دڤێت ب رێیا كارێ خۆ خزمه‌تا هونه‌ر و موزیكا كوردی بكه‌م.
