من دیرۆكا باب و باپیران پاراستیە
هەرهین محەمەد:
دەنگبێژ (هوشەنگ نێروەیی) د دیدارەكێ دا بۆ رۆژنامەیا ئەڤرۆ گۆت: مەزنترین مفا من ژ سترانێ دیتی من هەستپێكر كو ئەز بوویمە زیندی دەمێ ئەز سترانا كوچكو دیوانان دبێژم و ئەز هەستپێدكەم من دیرۆكا باب و باپیران ژ بەرزەبوونێ پاراستیە و ئەو سترانێن وی دەمی وان دگۆتن رەنگە هندەك ژ وان نەهاتینە تۆماركرن و ئەز ل وان سترانان دگەڕم یێن كێم بهێنە گۆتن و جارەكا دی دبێژم و دئینمە هەبوونێ و دهێنە تۆماركرن و ل سوشیال مەدیایێ ژی دهێنە بەلاڤكرن و بڤێ چەندێ سترانبێژێن دەواتان مفایی ژی دبینن و ل دەواتان دبێژن.
هوشەنگی گۆت: ئەز وەكو دەنگبێژەك دبینم سترانا كوچكودیوانان وەكو ئەردی و بارانێ یە و هەموو دەمان ناهێتە گۆتن و دەمێ وەرزێ وێ دهێت تامەكا دی ددەت و دەنگبێژی پێدڤی ب گوهدارەكێ ژێهاتی یە و دەمێ دبینم پیرو كال و گەنج ل دیوانێ دروینشتینە و چاڤ و گوهێ وان یێ ل هیڤیا دەنگەكی ل وی دەمی دبێژم و ستران نەبتنێ بۆ كەیفخۆشیێ یە، بەلكو ستران ل وی دەمی ژی دهێتە گۆتن هەكە كەسەكی خەمەك هەبیت ل وی دەمی ژی دهێتە گۆتن، ئانكو ستران بۆ ڤەژاندنا خەمێ ژی دهێتە گۆتن.
