من زانی دێ چی
ئامادەكرن و وەرگێڕان:
ئازاد بەرواری/ ئەلمانیا
كوڕكەكێ گەلەك ئارام و میهرەبان بوو ب تایبەتی بەرانبەر دایك و بابێن خۆ. ل ژیێ نێزیكی دەه سالیێ ئێشەكێ گرت، هینگی ژی نەخۆشخانە و دختۆر گەلەك كێم بوون. چاڤێن وی وەسا كول بوون و چ چارە بوو نەبوو هەتا ل داویێ ل ژیێ دەه سالیێ هەردو چاڤێن خۆ ژ دەست دان و كۆرە بوو.
پشتی هینگی كەفتە د خەلوەتا تەنهایێ دا، ئیدی تێكەلیا زاروكێن گوندی نە دكر، گەلەك كێم ژ مال دەر دكەفت. چونكی ئەو بخۆ نە دشیا دەركەڤیت و پێ نەخۆش بوو كو وەك بارەك ل سەر ملێن دایك و بابێن خۆ بیت. دەستهاڤێتە تەمبیرلێدانێ و بوو سترانبێژ و میۆزیك ژەنەكێ گەلەك ب ناڤ و دەنگ.
دایكا وی هەمی گاڤا پشتی نڤێژێ دەستێن خۆ بو بانێ ژووری بلند دكر، كو خودێ ژنكەكێ بكەتە رزقێ كوڕێ وێ بەری كو دایك و باب بمرن، داكو نەمینیتە بێ خودان. خودێ وەسا حەز كر بەری كو دایك باب بچنە بەر دلۆڤانیا خودێ، كچكەكا گوندی ِازی بوو شوی ب كوڕێ وان یێ كۆرە بكەت.
پشتی چەندەكێ دایك و باب مرن و ئەو ژی مانە بتنێ. پشتی چەند سالەكان، شەڤەكێ ژنك هەتا بەرێ سپێدێ نەنڤست. گاڤەكێ ڕابوو، بوغچەكا خۆ پێچا و دەركەفت و بلەز پێلاڤا خو كرە پێ خۆ و چوو سەر ڕێكا گوندی، ل وێرێ دوستێ وێ ل بەندا وێ بوو. دەست هاڤێتنە دەستێت هەڤدو و ل گوندی دویر كەفتن و پێكڤە ڕەڤین.
هەتا باش ژ گوندی دویر كەفتین و سنوورێن تڕسێ دەرباز كرین، ژنكێ هەست پێ كر كو پێلاڤا وێ (كتا ڕاستێ) گەلەكا تەنگە و پێ وێ دئێشینیت. دەمێ پێلاڤ ژپێ خۆ كری، دا بزانیت ئە بۆچی وەسایە! دیت كاغەزكەكا پێچای یا د ناڤ پێلاڤا وێ دا.
كاغەز ڤەكر، هێڤ كرێ گولمچكەكا پارەی تێدا بوو و دناڤ كاغەزەكێ دا یا پێچای بوو، ئەڤ چەند ڕێزكە ل سەر هاتبوون نڤیسین.
«من هەست پێ دكر كو تە دل ل سەر زەلامەكی دی یە، و من زانی كو تو یا كارێ خۆ دكەی دا بڕەڤی، و من زانی دێ ئەڤ شەڤە ڕەڤی و بۆ ئێكجاری چی.. لێ من نەڤیا ببمە ئاستەنگ ل بەر ڕێكا تە و ژیانا تەیا نوی، ئەڤ پارە ژی مافێ تە یە كو ئەڤە هندە سالە تە خزمەتا من كری و هەڕە و گەردەنا تە ئازا و بخێر بچی.»
