من هزر د چێكرنا چو ئه‌لبۆمێن سترانان دا نه‌كریه
زنار تۆڤی:
هونه‌رمه‌ند دلیار شێخۆ، خه‌لكێ كۆبانێ یه ل رۆژئاڤایێ كوردستانێ، نوكه ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دبێژیت ل سالا 2025 ێ، من چه‌ندین كۆنسێرت گێراینه، هه‌روه‌سا ئه‌ڤه 9 ساله ئه‌ز ل گه‌ل گرۆپه‌كێ ئه‌لمانی بناڤێ ( سۆند ئاوف هۆپ) یێ هونه‌ری كار دكه‌م، ئه‌ز ل گه‌ل وی گرۆپی ژی دچمه ئاهه‌نگ و كۆنسێرتان و سترانێن كوردی دبێژم، هه‌روه‌سا من ستۆدیۆیه‌ك ژی هه‌یه، ئه‌ز ل وێرێ ستران و به‌رهه‌مان تۆمار دكه‌م، دیسا من چه‌ند سترانێن نوو ژی تۆماركرینه، وه‌كو سترانا (رۆژباش كۆبانێ)، كو من ب سه‌ركه‌فتنا كۆبانێ چێكریه، هه‌وره‌سا سترانا ( پیرۆز به)، ل گه‌ل سترانه‌كا فولكلۆری بناڤێ ( لۆره لۆره) من چێكریه، كو ئه‌و سترانه ژ فولكلۆرێ كۆبانێ یه، ل گه‌ل هندێ هه‌لبه‌ستڤان ( باران حسۆ)، گه‌له‌ك هاریكاریا من كریه و پرانیا وان سترانێن من گۆتین، ژ په‌یڤێن وینه.
ناڤهاتی گۆت ژی: سترانبێژێن عه‌ره‌ب و توركان و یێن گه‌لێن دیتر ژی، كلتۆرێ مه دزییه، وان موزیكا كوردی برینه و بناڤێ خۆ تۆماركرینه، هه‌روه‌سا من سترانه‌كا دو قولی بناڤێ ( شمه‌ك زه‌ر) ل گه‌ل خانما سترانبێژ ( هۆزان جانێ) چێكریه، كو په‌یڤ و ئاوازێن وێ سترانێ یێن هۆزان جانێ نه، كارێ دابه‌شكرنا موزیكێ من چێكریه، ئه‌ز ب خۆ ژی ئامیرێن موزیكێ دژه‌نم، ب تایبه‌تی ژی ته‌مبۆرێ، دیسا مه گرۆپه‌كێ موزیكێ ب ناڤێ ( كۆبانێ) چێكریه و هه‌موو هونه‌رمه‌ند و موزیكژه‌ن خه‌لكێ كۆبانێ نه، ئه‌م بزاڤان دكه‌ین، ئه‌و سترانێن فولكلۆری یێن خه‌لكێ كۆبانێ گۆتین، وان سترانان هه‌موویان تۆمار بكه‌ین و بپارێزین.
ناڤهاتی گۆت ژی: من دو سترانێن دوقۆلی ل گه‌ل خانما سترانبێژ (سلاڤا رۆژئاڤا) گۆتینه، كو ئه‌و ژی سترانا ( ده‌ستمالا من) و سترانا ( ئه‌ز كه‌چم كه‌چا كوردانم)، هه‌روه‌سا چێكرنا ئه‌لبۆمان كاره‌كێ ب زه‌حمه‌ته و ئێدی ئه‌م ل هزر ل چێكرنا ئه‌لبۆمێن سترانان ناكه‌ین، ب تنێ سالانه ئه‌ز چه‌ند سترانێن سینگل چێدكه‌م و به‌لاڤ دكه‌م، د هه‌مان ده‌مدا ئه‌ز پرسا خۆ ب هونه‌رمه‌ند و موزیكژه‌نان دكه‌م، كانێ ڤێ موزیكێ یان ڤێ سترانێ دروست بكه‌م.
دلیار هێشتا دبێژیت: هه‌كه په‌یڤ و ئاوازێن سترانه‌كێ د خۆش بن، كلیپا وێ سترانێ ژی دێ یاخۆش بیت و خه‌لك ژی دێ حه‌ز ژ وێ سترانێ و كلیپێ كه‌ن، به‌لێ هه‌كه به‌رۆڤاژی بیت و ناڤه‌رۆكا وێ سترانێ یا نه‌خۆش بیت، كلیپ ژی دێ یا نه‌خۆش بیت و خه‌لكێ مه حه‌ز ژێ ناكه‌ت، هه‌روه‌سا ژیانا مه ل ئورۆپا یا ب زه‌حمه‌ته، به‌لێ دڤێت ئه‌م زمان و كلتۆرێ خۆ بپارێزین و زارۆكێن خۆ ژی فێری زمان و كلتۆرێ كوردی بكه‌ین، هه‌روه‌سا مه كوردان ل ده‌رڤه‌یی وه‌لاتی په‌یوه‌ندیێن بهێز ل گه‌ل ئێك هه‌نه.
هێشتا دبێژیت: ئه‌م بزاڤان دكه‌ین، كو ئێدی 21 ی ئادارێ ببیته جه‌ژنه‌كا فه‌رمی بۆ كوردان ل وه‌لاتێ ئه‌لمانیا، هه‌روه‌سا ئێدی ئه‌م دشێین ب ساناهی د وارێ موزیكێ دا كارێن خۆ یێن هونه‌ری ئه‌نجام بده‌ین و ب رێیا ئینته‌رنێتێ ئه‌م كارێن خۆیێن موزیكێ ب رێیا موزیكژه‌نێن كورد ل كوردستانێ و ل ده‌رڤه‌یی وه‌لاتی ئه‌نجام دده‌ین، هه‌ر چه‌نده د به‌رێدا تاما موزیكا كوردی خۆشتربوو، به‌لێ نوكه سترانێ ئه‌و تاما به‌رێ نه‌مایه، هه‌روه‌سا كۆمڤه‌كرنا موزیكژه‌نان ژی كاره‌كێ ب ساناهی نینه و هنده‌ك جاران هه‌تا ئه‌م موزیكژه‌نان كۆمڤه دكه‌ین، ئه‌م زه‌حمه‌تێ دبه‌ین، چونكی موزیكژه‌نێن كورد ل وه‌لاتێن ئورۆپا به‌ربه‌لاڤ بووینه و هه‌روه‌سا ئه‌ز كار ل سه‌ر تۆماركرنا هنده‌ك به‌رهه‌مێن نوو یێن هونه‌ری دكه‌م.
