من چو خێر ژ ستران گۆتنێ نه‌دیتیه
هه‌رهین محه‌مه‌د:
سترانبێژێ گه‌نج بێوار عزه‌ت د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: من گه‌له‌ك خزمه‌تا هونه‌ری یا كری ژ سالا 2001 و 2002 و هه‌تا نوكه ژی یێ به‌رده‌وامم و من گه‌له‌ك قوربانی داینه بۆ هونه‌ری و من گه‌له‌ك خزمه‌تا هونه‌ری یا كری و من گه‌له‌ك تشت دانه هونه‌رێ كوردی، به‌لێ هه‌تا نوكه هونه‌رێ كوردی هیچ تشته‌ك بۆ من نه‌كریه و ژبلی به‌رنیاس بوونێ چو تشتێ دی نه‌دایه من و ده‌مێ مرۆڤ به‌رنیاس دبیت خه‌لك رێزێ ل مرۆڤی و هونه‌رێ مرۆڤی دگریت، به‌لێ ژلایێ مادی ڤه من چو خێر ژ هونه‌ری نه‌دیتیه و دبینم چ سترانبێژ نین بێژیت من سترانا كوردی یا به‌رنیاسكری، چونكۆ زمان و سترانێن كوردی دكه‌ڤنارن و مێژوویه‌كا دوورو درێژه سروشت و جوانیا كوردستانێ و وه‌لاتپارێزی وه‌ل من كر سترانا بێژم.
ل دۆرنووترین ده‌نگ و باسێن خوه یێن هونه‌ری بێواری گۆتژی نوكه مژوولی حه‌فت هه‌شت سترانا مه و ب شێوازه‌كێ مودرێن هاتینه‌چێكرن و نوكه دقووناغا میكس و ماسترینگێ دانه دێ كه‌مه ئه‌لبۆمه‌ك و ژڤانه ل دەمەکێ نێزیك بهێنه به‌لاڤكرن.
ناڤهاتی ئه‌و چه‌نده ژی گۆت: هونه‌رمه‌ند ته‌حسین تەها ب كه‌سایه‌تی و ده‌نگێ خوه ڤه گه‌له‌ك دەف من یێ تایبه‌ته و سترانا وی بناڤێ (تو خه‌ون بووی هه‌می گاڤان) هه‌موو ده‌مان دبێژم خوزی ئه‌و سترانه‌یا من با، ژ به‌ركو سترانه‌كا گه‌له‌ك خوەشه و ئه‌ز ئێك ژ داغبارێن ده‌نگێ وی مه و بۆ سترانا دوقۆلی ژی هه‌تا نوكه چ ده‌نگێن هونه‌رمه‌ندێن كچ دسه‌رێ من دا نین كو بێژم ده‌نگێ وێ ل گه‌ل ده‌نگێ من بگونجیت، به‌لێ دئاینده‌ی دا دێ من سترانه‌كا دوقولی هه‌بیت و بۆ سترانا دوقولی ژی مه‌رجێن خوه هه‌نه و دڤێت ده‌نگ و كه‌سایه‌تی و كارێكته‌ریا وێ نێزیكی یا مرۆڤی بیت دا بینه‌ری ژ خوه رازی بكه‌ت و هه‌تا نوكه نه‌یێ په‌شێمانم بۆ چو كارێن خوه یێن هونه‌ری، ژ به‌ركو هه‌ر كاره‌كێ من دده‌مێ خوه دایێ كری و چو كاران ژی ناكه‌م خه‌له‌تی تێدا هه‌بیت و من په‌شێمان بكه‌ت، له‌ورا هه‌لبژارتنا سترانان گه‌له‌ك یا گرنگه به‌ری مرۆڤ بێژیت.
