من چو سپۆنسه‌ر نینن و پشتا من ب خودێ یا گه‌رمه
هه‌رهین محه‌مه‌د:
هونه‌رمه‌ندا سترانبێژ دلبه‌ر جزیری د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ده‌مێ ئه‌ز ل كوردستانێ من گه‌له‌ك كارێن هونه‌ری كرینه و نه ب دلێ منن و ژ لایێ ده‌نگ و مۆزیكێ ڤه و گه‌له‌ك یا په‌شێمانم من ل گه‌ل وێ كومپانیێ كاركری ل هەرێما کوردستانێ و مه‌زترین خه‌له‌تی من دژیانێ دا كری من ل گه‌ل وێ كاركری و ژ وێ رۆژێ وهه‌تا نوكه ل هەرێما کوردستانێ من ل گه‌ل كه‌سێ كارنه‌كریه و بۆ كارێن خوه یێن هونه‌ری من چو سپونسه‌ر نینن ژ بلی خودێ و هه‌ر پێنگاڤه‌كا ب هاڤێژم ناڤێ خودێ دئینم كو وی كاری ب جوانی و سه‌ركه‌فتیانه بكه‌م و گه‌له‌ك كه‌س وه‌سا هزردكه‌ن بۆ كارێن من یێن هونه‌ری گه‌له‌ك كه‌س و كۆمپانی خوه دكه‌نه خودان و ئه‌ز بخوه ل گه‌ل هه‌ر كه‌سەکێ هه‌بیت كارناكه‌م و راسته كێم كاردكه‌م، به‌لێ هه‌كه من كاركر دڤێت وه‌كو دلێ من بیت ئه‌و كاره و بزانم یا ئارامم ل گه‌ل وان كه‌سان یێن كو ئه‌ز ل گه‌ل كاردكه‌م.
ل دۆر نووترین كارێ خوه دلبه‌رێ گۆت ژی: نوكه ئاماده‌كاریێن فیستیڤاله‌كا نێڤدەولەتی دكه‌ین و كه‌سێن به‌رنیاس و ژ هولیودێ ژی دێ پشكداربن و ئه‌م ل سه‌ر دو فلمان كاردكه‌ین و وه‌كو پرۆدیوسه‌ر تێدا كاردكه‌م و ئه‌و فلمه ژلایێ وەلاتێ فه‌ره‌نسا ڤه هاتیه چێكرن و حكومه‌تا فه‌رەنسا ژی ل گه‌ل هاریكار و پشته‌ڤانه.
دلبه‌ر جزیری ئه‌و چه‌نده ژی گۆت: ئه‌ڤه نێزیکی دەهـ ساله پتره نه‌هاتیمه هەرێما کوردستانێ و دووماهی جار هاتیم ئه‌ز و برایێ خوه بووین ئه‌م هاتینه هه‌ولێرێ و گه‌له‌ك كه‌یفخوەش دبم ده‌مێ كه‌س وێنه‌یان ل گه‌ل من دگرن و دزانم ئه‌ڤه حه‌زژێكه‌رێن من و ده‌نگێ منن و چه‌وا ئه‌و حه‌زدكه‌ن وێنه‌یان ل گه‌ل من بگرن من ژی دڤێت ل گه‌ل وان بگرم و من ژی دڤێت كه‌سایه‌تیا وان بنیاسم و كا ئه‌و چ كاردكه‌ن دژیانێ دا و ئه‌ز ژی مرۆڤم و دبیت دچاڤێ وان دا هونه‌رمه‌ندبم، یان ئه‌كته‌ربم ، یان ل به‌ر هنده‌ك كه‌سێن دی كچا مالا خوه‌بم و ئه‌ز بخوه ژی كچه‌كا نورمالم و هڤیا من ئه‌وه جاره‌كا دی بێمه باشو رو حه‌زژێكه‌رێن خوه بینم .
