من گەلەك قوربانیێن داین هەتا هاتیمە دناڤ هونەری دا
سندس سالح سلێڤانەیی:
زۆزان خدر، ئەكتەرەكا پارێزگەها دهۆكێ یە، د دیدارەكێ دا بۆ ئەڤرۆ دیاركر كو ئەڤە نێزیكی دەه سالانە ئەو دبۆارێ هونەری دا كاردكەت و هەتا نوكە پشكداری د هەشت دراما و پێنج كورتە فلمان دا كریە و هیڤیا وێ ئەوە ل پاشەرۆژێ ناڤێ وێ هەر بمینیت، هەروەسا بشێت گەلەك گەنجێن ڤی باژێری فێری كارێ هونەری بكەت.
زۆزانێ گۆت: ئێكەم دراما من پشكداری تێدا كری ب ناڤێ (سنۆر) بوو، بەس بەری وی دەمی من هندەك كارێن دی كربوون، ل دەستپێكێ ئەز ئێكەم كچ بووم ل دهۆكێ من پشكداری د درامایەكێ دا كری، ل وی دەمی بۆ جڤاكێ مە تشتەكێ غەریب بوو، پاشان بۆ وان دیاربوو كو ئەز ل دووف رەوشت و تیتالان كاردكەم، لەورا رێزەكا مەزن ل من دگرن، هەموو رۆلێن ئەز پێ رابوویم ب دلێ منن ب تایبەت یێن درامایا (تەعل و شرین) چنكو سیزن دهاتە گۆهۆڕبن و من پتر خوە تێدا ددیت، حەز دكەم رۆژەك بهێت ئەوا د دلێ خوە دا ئەز چێكەم و من سیناریۆیا بۆ دانای، هەتا ئەو رۆژ بهێت و چێكرنا درامایان یا ب زەحمەتە و شەڤ و رۆژ بۆ وێنەكرنێ دڤێن و من گەلەك قوربانیێن داین هەتا هاتیمە دناڤ هونەری دا.
