مهاباد ئیبراهیم: من هه‌می ده‌رگه‌ه قوتان و كه‌سێ خوه ل من نه‌كره خودان
ئه‌ڤرۆ، رێوار محه‌مه‌د ره‌شد:
هونه‌رمه‌ندا كورد (مهاباد ئیبراهیم) د دیداره‌كێ دا بۆ رۆژناما ئه‌ڤرۆ دیار كر كو نوكه ئه‌و د ره‌وشه‌كا خراب دا دژیت و چو داهاتێ پێدڤی ل به‌رده‌ستێن وێ نینن بشێت ژیانا خوه پێ ب رێڤه‌ببه‌ت و گۆت: “من ژیانا خوه هه‌می بۆ كارێ هونه‌ری و خزمه‌تكرنا وه‌لاتێ خوه ته‌رخانكر و ژ ده‌رڤه‌ی وه‌لاتی من گه‌له‌ك خزمه‌تا هونه‌رێ كوردی كریه و ب ده‌هان ئاهه‌نگ بێ به‌رامبه‌ر گێڕاینه و ئه‌ڤه بۆ ده‌مێ حه‌فت سالانه ئه‌ز ژ ده‌رڤه‌ی وه‌لاتی زڤریمه و ل پارێزگه‌ها دهۆكێ ئاكنجیبوویمه، به‌لێ مخابن نوكه ئه‌ز بێ خودان مایمه و من چو داهات نینن ژیانا خوه پێ ب رێڤه‌ببه‌م و هه‌كه ب هیڤیا هنده‌ك خێرخوازێن باژێرێ دهۆكێ ڤه نه‌بیت ئه‌ز نه‌شێم ئێك رۆژ ژی ژیانا خوه ببورینم و نوكه ژی من پێدڤیێن ناڤمالی و جلك و هتد… نینن، ئه‌ڤه د ده‌مه‌كی دایه هه‌ر ژ ده‌ستپێكا زڤرینا من ژ ده‌رڤه بۆ پارێزگه‌ها دهۆكێ من هه‌می ده‌رگه‌هێن لایه‌نێن په‌یوه‌ندیدار قوتاینه و هه‌تا نوكه كه‌سێ خوه ل من نه‌كریه خودان و ژ نوكه وێڤه بلا كه‌س نه‌بێژیته من بۆ باشتركرنا ره‌وشا ژیانا خوه و ب ده‌ستڤه‌ئینانا داهاته‌كی نڤیساره‌كێ بده فلان جهی، ئه‌ز ب ڤێ ژیانێ ڤه گه‌له‌ك ماندوو بووم”.
هونه‌رمه‌ندا ناڤهاتی ئاشكرا كر وێ پێدڤی ب داهاته‌كی هه‌یه وه‌كو مووچه، یان ژی جهه‌كێ ئاكنجیبوونێ بۆ بهێته دابینكرن و جهه‌ك بۆ بهێته ڤه‌كرن ل به‌ر كار بكه‌ت و داهاته‌كی بۆ خوه په‌یدا بكه‌ت و گۆت: “ئه‌ز هونه‌رمه‌نده‌كا كوردم د ژیێ 58 سالیێ دامه ئه‌ز ناڕابم پشتی ڤێ خزمه‌تا خوه یا دوور و درێژ د هونه‌ری دا بچم ببمه كرێكار ل به‌ر ده‌ستێ خه‌لكی كار بكه‌م، ئه‌ڤه دده‌مه‌كی دایه یا بێ هه‌ڤژین و زارۆكم و كه‌سوكارێن من ژی د نه‌چار نینن من بخودان كه‌ن ژ به‌ر كو ئه‌ز زارۆ نینم”.
