مهترسیا روودانێن خهندقینێ ل سهر رووبارێ زێ زێدهدبن
ئامێدیێ، مهحمود نهێلی
ژبهر ههبوونا سێ رووبارێن مهزن و هژمارهكا زۆرا جهێن گهشتیاری یێن سهر ئاڤا رۆژانه گهشتیار قهست دكهنێ، زێدهباری وێ یهكی رووبارێ زێ یێ مهزن دناڤهندا ناحیا دێرهلۆك دا دهرباز دبیت، دبیته ئهگهر سالانه چهندین روودانێن خهندقینێ ل سهر ڤان رووباران دروست دبن.
سهردار یوسف، ئاكنجیێ سهنتهرێ ناحیا دێرهلۆك دیار كر، ههبوونا تیما نقومڤان ل دهڤهرێ ئێك ژ پێدڤیێن گرنگه، ژ بهر كو دێرهلۆك دكهڤیته سهر سێ رووباران، زێدهباری نوكه چهندین جهێن گهشتیاری ل دهڤهرێ هاتیه درووست كرن و پرانیا وان ژی ل سهر ئاڤا رووبارێ شێرانكی نه و گۆت: ئهڤه زێدهباری وێ یهكێ زێیێ مهزن د ناڤهندا سهنتهرێ ناحیا دێرهلۆك دا دهرباز دبیت، زارۆیێن مه خوه دئیخنه ڤێ ئاڤێ، ئهڤێ یهكێ ژی مهترسی ل سهر ژیانا زارۆیان دروستكریه.
نهقیب ئیحسان سهنعان بهرپرسێ بنگههێ بهرهڤانیا باژێری ل دێرهلۆكێ بۆ رۆژناما ئهڤرۆ دیاركر، ژبهر نهبوونا تیما نقومڤانا ل ناحیا دێرهلۆك دهمێ دروست بوونا ههر روودانهكی ئهو پهیوهندیێ ب بنگههێ شێلادزێ یان ئامێدیێ دكهن داكو تیمێن نقومڤان بو ب هنێرن و گۆت: مه ب نڤیسار بهری نوكه ژی جهێن پهیوهندیدار ل سهر ڤێ ئاریشهیێ ئاگههدار كرینه، لێ ژ بهر نهبوونا دامهزراندنێ تا نوكه ئهڤ بابهته ب ههلاویستی مایهڤه.
سامی ئوشانه رێڤهبهرێ ناحیا دێرهلۆك بۆ رۆژناما ئهڤرۆ دیار كر، ژلایێ خوه ڤه وان لایهنێن پهیوهندیدار ئاگههدار كرینه و دامهزراندنا تیمهكا نقومڤان ل دهڤهرێ كارهكی فهره و گۆت: (دێ بزاڤێن رژد كهین ئهڤ بابهته بهێت چاسهرهكرن و تیمهكا نقومڤانان ل دهڤهرێ بهێته دانان و دێ ب ههموو لایهكی ڤه ژی هاریكار بین دگهل دا).
