مه‌حفوز ئیبراهیم: ل دهۆكێ به‌رهه‌ڤی بۆ مێڤانداریا هه‌لبژارتیێن عه‌ربی هاتیه كرن
ئه‌ڤرۆ،
د داخویانیه‌كێدا سه‌رۆكێ ئێكه‌تیا كیك بۆكسینگا پارێزگه‌ها دهۆكێ بۆ رۆژناما ئه‌ڤرۆ دیاركر كو باشترین شێوه به‌رهه‌ڤی و مێڤانداری بۆ هه‌لبژارتی و یانێن ده‌ه وه‌لاتێن عه‌ره‌بی هاتینه كرن ئه‌وێن چاڤه‌رێ یه ئه‌ڤرۆ بهێنه هه‌رێما كوردستانێ ژبۆ پشكداریا قاره‌مانیا عه‌ره‌بی بكه‌ن كو دێ سوبه‌هی هه‌ڤڕكیێن وێ ل هۆلا گرتیا زانكویا دهۆك بۆ ماوێ پێنچ رۆژان هێته ئه‌نجامدان.
زێده‌تر ناڤهاتی گوت: ئه‌ڤه بۆ جارا ئێكێ یه د دیرووكا یاریا كیك بۆكسێگا پارێزگه‌هێ و ئیراقێ دا قاره‌مانیه‌كا بڤی شێوه‌یی كو ده‌ه وه‌لات و زێده‌تری 30 یانێن ئیراقێ و عه‌ره‌بی پشكداربن ئه‌ڤچه‌نده ژی ب سۆپاسی ڤه كو ژلایێ به‌رێزان دیار ته‌یب ئه‌ندامێ په‌رله‌مانێ ئیراقێ سه‌ر لیستا پارتی دیموكراتی كوردستان و شاكر ئه‌حمه‌د سمو رێڤه‌به‌رێ گشتی یێ وه‌رزشی ل هه‌رێمێ و ب هه‌ڤكاریا پارێزگارێ دهۆكێ به‌رێز عه‌لی ته‌ته‌ر و نوونه‌راتیا دهۆك یا لژنا ئۆلۆمپیا كوردستانێ ئه‌وێن پشته‌ڤان و هه‌ڤكار بووین كو پارێزگه‌ها دهۆكێ مێڤانداریا مه‌زنترین قاره‌مانی سه‌ر ئاستێ رۆژهه‌لاتا ناڤین بكه‌ت، پێنه‌ڤێت مێڤانداریه‌كا مێژوویه و كێم وێنه‌یه ئه‌ڤه دێ بیته كه‌رنه‌ڤاله‌كێ وه‌رزشی یێ مه‌زن شاندنێن ده‌ه وه‌لاتێن عه‌ره‌بی بهێنه دهۆكێ و هه‌روه‌سان لدویڤ به‌رنامێ مه كو بشێوێ ئاهنگه‌كا تایبه‌ت بهێته دانان ژ روویێ كه‌له‌تۆر و دیروكی یێ هه‌رێما كوردستانێ و پارێزگه‌هێ بۆ پشكداران ب ده‌ینه نیاسین ئه‌وا دێ به‌رهه‌ڤبوونا نوونه‌رێن وه‌لاتێن پشكدار و باسم ئه‌لشاعر سه‌رۆكێ ئێكه‌تیا عه‌ره‌بی و وه‌سفی ئه‌لشه‌وابكه ئه‌میندارێ گشتی یێ ئێكه‌تیا عه‌ره‌بی و ژماره‌كا مه‌زن یا به‌رپرسێن حكومی و حزبی كو دێ ره‌وشا ئاهنگێ و قاره‌مانیێ قه‌شه‌نگ كه‌ن.
ژلایه‌كێ دیڤه ناڤهاتی دیاركر كو پارێزگه‌ها دهۆكێ دێ ب ئێك یانه پشكداری قاره‌مانیێ بیت سه‌رباری د ده‌مه‌كی دا چاڤه‌رێ بوو زێده‌تری سێ یانێن پارێزگه‌هێ به‌رهه‌ڤبوون ژوانا زاخۆ، ئامیدیێ و شێخان، له‌ورا ده‌رئه‌نجام مه سێ ئاستێن جودا و ل سه‌ر 12 كێشان كو دبنه سێ تیم بناڤێ یانا دهۆكێ به‌رهه‌ڤكریه ئه‌وژی لاوان، پێشكه‌فتی و كچان هه‌موو یاریزان ژ یانێن دهۆك، زاخۆ، شێخان ئامێدیێ هاتینه داخوازكرن دهێته هژمارتن وه‌كو هه‌لبژارتیێ پارێزگه‌هێ پێخه‌مه‌ت پشكداریه‌كا بهێز و نوونه‌راتیا پارێزگه‌هێ ب سه‌ركه‌فتیانه بهێته‌كرن ژبه‌ركو هه‌بوونا ڤێ قاره‌مانیێ ده‌لیڤه‌كا زێرینه و مێژوویه بۆ وه‌رزشا كوردستانێ و پارێزگه‌ها دهۆكێ و قۆناغه‌كا دی یا دانه نیاسینی یا كوردستانێ بۆ وه‌لاتێن عه‌ره‌بی.
