مه‌رحه‌با بۆ دو ئیداره‌یی ل هه‌رێما كوردستانێ
د دیرۆكێ دا مه دیتی یه كو دو نه‌ته‌وه یان دو ده‌وله‌ت هه‌ڤڕكیێ ل سه‌ر پارچه‌كا ئه‌ردی یان ده‌ڤه‌ره‌كێ دكه‌ن و هه‌ر ئێك وێ ده‌ڤه‌رێ ب یا خوه دزانیت، له‌ورا هه‌ڤڕكیێ و شه‌ڕی و دانوستاندنان ل سه‌ر دكه‌ن و ره‌نگه دانوستاندنێن وان ب سالان درێژ بن یان بمیننه ڤه‌كری یان ژی بگه‌هنه چاره‌سه‌ریه‌كا ناڤین، نموونه ژی دزۆرن مینا قوبرسێ كو هه‌تا نها قوبرسا پشكا توركی و پشكا یۆنانی هه‌یه هه‌روه‌سا كه‌شمیر د ناڤبه‌را هندێ و پاكستانێ دا، لێ به‌روڤاژی ڤێ ئێكێ ل هه‌رێما كوردستانێ روو دده‌ت، ئێك هه‌رێمه و ئێك ئاخه و ئێك زمان و كولتۆره و ئه‌م یێن بووینه پالێن دوژمێن خوه و دخوازین ڤێ هه‌رێمێ بكه‌ینه دو ئیداره.
ئه‌ڤ پارچا دبێژنێ هه‌رێما كوردستانێ پشتی شه‌ڕێ براكۆژیێ ببوو دو ئیداره، لێ پشتی شه‌ڕێ براكۆژیێ ب دووماهی هاتی ئه‌ڤ پارچه وه‌كو پارچه‌كا نیمچه سه‌ربخۆ بوویه، ب تایبه‌تی پشتی سالا 2003 و پرۆسا دیمۆكراسیێ یا به‌رده‌وام بوو و رۆژ بۆ رۆژێ پتر مه به‌حسێ ده‌وله‌تبوونا كوردی دكر، لێ هه‌تا نها پاشمایێن دو ئیداره‌یی ل هه‌رێمێ هه‌نه و بووینه فاكته‌رێن هاریكار بۆ ئالۆزیان هه‌تا كو ئه‌و فاكته‌ر بووینه ناكۆكیێن حزبی و ده‌رگه‌ه بۆ دوژمنان ڤه‌بووین كو ژه‌هرا خوه دارێژن و ب پلانێن خوه ده‌رز ئێخستنه د ناڤ مالا كوردی دا و بووینه سه‌ده‌م كو هێدی هێدی ژ پرسێن نه‌ته‌وه‌یی دوور بكه‌ڤین و ب تنێ میننه ب پرسێن ناڤخۆیی ڤه، هه‌تا گه‌هشتیه وێ رادێ كو سه‌رۆكێ جڤاتا پارێزگه‌ها سلێمانیێ جاره‌كا دی به‌حسێ دو ئیداره‌یێ بكه‌ت، ب دیتنا من ئه‌و ژی هه‌ر ئێك بوو ژ پلانێن دوژمنان و ئه‌ڤه فیتنه‌یه. پێغه‌مبه‌رێ ئیسلامێ سلاڤێن خودێ ل سه‌ر بن دبێژیت (فیتنه یا نڤستیه، له‌عنه‌تا خودێ ل وی بیت یێ هشیار بكه‌ت). هه‌می ئالی ب گۆتنێ رازی نینن كو هه‌رێما كوردستانێ ببیته دو ئیداره، لێ هنده‌ك ئالی ب كریار كاری بۆ پارچه‌كرنێ دكه‌ن، ئه‌ڤ ئێكه ژ چه‌ندین كریاران دیار بوو، ب تایبه‌تی د كۆمبوونێن پێنج قولی دا كو هنده‌ك ئالی یێ هه‌رێما كوردستانێ به‌ره‌ف دو ئیداره‌یێ ڤه دبه‌ن، چونكی هه‌می كۆمبوون ل هه‌ولێرا پایته‌خت دهاتنه سازكرن، لێ مه دیت ژ نشكه‌كێ ڤه كۆمبوونه‌ك بره سلێمانیێ و رێككه‌فتینه كو كۆمبوونا بهێت ژی ل سلێمانیێ بهێته كرن، باشه ئه‌ڤه چ دگه‌هینیت؟ هه‌كه دو ده‌وله‌تن كۆمبوونه‌ك ل ڤێ ده‌وله‌تێ بیت و ئێك ل ده‌وله‌تا دی بیت نۆرماله! هه‌كه بێژن كۆمبوون دێ ل هه‌رسێ پارێزگه‌هێن هه‌رێمێ هێنه كرن، باشه ئه‌ڤه چه‌ند كۆمبوون هاتنه كرن بۆچی ئێك ل دهۆكێ نه‌هاتیه كرن؟ لێ بلا ئه‌م دكه‌تواری بین ئه‌ڤان كۆمبوونێن ل ڤێرێ و وێراهه بێهنا دو ئیداره‌یێ ژێ دفڕیت. ئه‌ڤه‌ژی بۆ چه‌ند سه‌ده‌مان دزڤڕیت وه‌كو:
* ئه‌ڤه ژ دووماهیا شه‌رێ براكوژیێ وه‌ره كوردستان یا ب ته‌وافوقێ ب رێڤه دچیت، كو نها دبێژنێ (سازان).
* هه‌تا نوكه ئالیێن سیاسی نكارینه شوونوارێن دو ئیداره‌یێ نه‌هێلن، چونكی هێشتا چه‌ند وه‌زاره‌ت و سازی دهه‌ڤگرتی نینن.
* هه‌ر ئالیه‌ك ب نهێنی و جودا بۆ خوه ل گه‌ل به‌غدایێ رێككه‌فتنان دكه‌ت، نموونه ل چه‌ند حه‌فتیێن بۆری كۆژمه‌كێ زۆرێ پاره‌ی گه‌هشتیه ئیدارا سلێمانیێ!. ئه‌ڤه هه‌می ئه‌گه‌ر و فاكته‌رن كو هه‌رێما كوردستانێ به‌ره‌ف دو پارچه‌یێ ڤه دچیت.
تشتێ ژ هه‌میان گرنگتر و مه‌ترسیدار ڤان ئالیێن سیاسی كه‌ربوكین و نه‌ڤیان ئێخستیه د دلێ وه‌لاتیان دا، ب ئاوایه‌كی كه‌ربێت خه‌لكێ سلێمانیێ ژ خه‌لكێ هه‌ولێرێ و دهۆكێ ڤه‌دبن و به‌رۆڤاژی. ئانكو ب ئاوایه‌كێ ئوتوماتیك خه‌لكێ هه‌رێمێ ژی بوویه دو پشك.
مخابن ل شوینا هه‌ڤگرتنێ و خورتكرنا ناڤمالا كوردی، كو ب ئێك ده‌نگ و ده‌ست هه‌مبه‌ری حوكمه‌تا فیدرال و ته‌عریبكرنا ده‌ڤه‌رێن كوردستانی راوه‌ستین، ئه‌م ب ده‌ستێن خوه یێ كه‌ركووكا نه‌دلێ كوردستانێ و نه‌ژی قودسا كوردستانێ ته‌عریب دكه‌ین، چونكی نها 500 هزار عه‌ره‌ب ل كه‌ركووكێ هاتینه ئاكنجیكرن و هێشتا كۆمبوونێن مه یێن پێنج قولی جار ل ئیدارا هه‌ولێرێ و جار ل ئیدارا سلێمانیێ دهێنه‌كرن.
ل دووماهیێ دێ بێژم ره‌نگه هنده‌ك خوانده‌ڤان هزر بكه‌ن كو ئه‌ڤه هاندانه‌كه بۆ دو ئیداره‌یێ ل هه‌رێما كوردستانێ، نه‌خێر ئه‌ز ب خوه دژی دو ئیداره‌یێ مه، چونكی دو ئیداره‌یی، ئانكو پارچه‌كرنا هه‌رێما كوردستانێ، مخابن دوژمنا ئه‌م كرینه چه‌ند پارچه (ئانكو ژ چار پارچا زێده‌تر) و ژنوو ئه‌م ژی رابین پارچه‌كێ پارچه بكه‌ین! هه‌تا نوكه مه له‌عنه‌ت ل دوژمنان دباراندن كو كوردستان پارچه پارچه كریه، باشه نها له‌عنه‌تا ل كێ ببارینین؟.
