مه‌زنترین دوو جهێن شوونواری ل پارێزگه‌ها دهوكێ دێ هێنه ڤه‌كرن
دهۆك، نه‌وزاد هلۆری:
ب مه‌ره‌ما زێده‌تر گرنگیدان ب شوونوارێن كوردستان و پارێزگه‌ها دهۆكێ، بریار ل سه‌ر ڤه‌كرنا مه‌زنترین دوو شوونوار ل پارێزگه‌ها دهۆكێ هاتنه دان و د نوكه دا پروژه چویه د وارێ بجهكرنێ دا كو ئه‌و ژی گرێ خه‌تارێ یێ شوونواری و پاركا شوونواری گه‌شتیاری یه ل عیراق و كوردستانێ كو دكه‌ڤنه پارێزگه‌ها دهۆكێ.
د. بێكه‌س بریفكانی، رێڤه‌به‌رێ شوونوار و كه‌له‌پورێ دهۆكێ بۆ رۆژناما ئه‌ڤرۆ گۆت: پشتی هه‌ول و بزاڤێن زۆر ل داویێ بریار ل سه‌ر ڤه‌كرنا مه‌زنترین شوونوار ل پارێزگه‌ها دهۆكێ هاته‌دان كو ئه‌و ژی گرێ خه‌تارێ یه، دیسان كار بۆ ڤه‌كرنا مه‌زنترین پاركا شوونواری گه‌شتیاری ژی ل پارێزگه‌ها دهوكێ كو مه‌زنترین پاركه ل عیراقی و كوردستان و ده‌ڤه‌رێ هاتیه‌دان، وه‌كو رێڤه‌ربه‌ریا شوونوار و كه‌له‌پوورێن دهوكێ و ب ئاماده‌بوونا رێڤه‌به‌رێ گشتی یێ شوونوار و كه‌له‌پووری ل كوردستانێ و سه‌رۆكێ تیمێ زانكویا ئودینی یا ئیتالی و قونسلێ گشتی یێ وه‌لاتێ ئیتالیا ل هه‌ولێرێ گرێبه‌ستا هه‌لكولینێن شوونواری ل گرێ خه‌تارا هاته ئیمزا كرن و چویه دوارێ بجهئینانێ دا.
زێده‌تر گوت: گرێ خه‌تارێ ئێك ژ جهێن شوونواری یێن مه‌زنه كو دكه‌ڤیته سه‌ر لێڤا روژهه‌لاتا گه‌لیێ سن ب دوراتیا 3كم ل گوندێ خه‌تارا یێ نوكه دووره، رووبه‌رێ وێ پتری 80 هكتارایه و دهێته ئه‌ژمارتن ئێك ژمه‌زنترین جهنشینێن كه‌ڤن یێن كو هه‌تا نوكه هاتیه دیتن ل باشورێ پارێزگه‌ها دهوكێ و باكورێ تلسقوف، ل سالا 2021ێ تیمه‌كێ هه‌ڤپشك د ناڤبه‌را رێڤه‌به‌رییا شوونوار و كه‌له‌پوورێن دهوكێ و زانكویا ئودینی یا ئیتالی، رووپیڤه‌كا به‌رفره ل سه‌ر جهی كر و د ئه‌نجام دا دیار بو كو ژیان هه‌بوویه هه‌ر ل چه‌رخێ نحاسی یێ كه‌ڤن و هنده‌ك پارچێن گوزا یێ سه‌رده‌مێ حه‌له‌ف تا سه‌رده‌مێ ساسانی هاتنه دیتن و هیچ ژ شوونوارێن سه‌رده‌مێ ئیسلامی نه‌هاتیه دیتن، دیسان جهێ خه‌تارا ل چه‌رخێ نحاسی یێ كه‌ڤن جهه‌كێ به‌رفره بویه نێزیكێ 40 هكتاران بویه، پاشان ل سه‌رده‌مێ نه‌ینه‌وا یا پێنجێ كێم بوونه‌ك ب خوڤه دیت، به‌لێ ل نیڤا هزارا سێیێ به‌رفره‌هبونه‌كا مه‌زن ب خوڤه دیت و به‌رده‌وام بویه، ل چه‌رخێ برونزی یێ ناڤه‌راست و سه‌رده‌مێ میتانیان وه‌ك سه‌نته‌ره‌ك شارستانی مه‌زن بویه رووبه‌رێ وێ نێزیكێ 70 هكتاران بویه).
