مه‌زنترین قاره‌مانیا ئیراقێ دێ ل دهۆكێ بیت
ئه‌ڤرۆ،
د داخویانیه‌كێ دا سه‌رۆكێ ئێكه‌تیا كیك بۆكسینگا پارێزگه‌ها دهۆكێ و ئه‌ندامێ ئێكه‌تیا ئیراقێ یا هه‌مان یاری دیار كر بڕیاره ل ناڤه‌راستا شۆباتا بهێت مه‌زنترین و ب هێزترین قاره‌مانیا ئیراقێ دێ ل دهۆكێ هێته رێكخستن و باشترین ده‌لیڤه‌یه بۆ یاریزانێن مه مفایی ژێ وه‌ربگرن.
زێده‌تر مه‌حفۆز ئیبراهیم بۆ رۆژناما ئه‌ڤرۆ گۆت: ل حه‌فتیا بۆری كۆمبوونا ئێكێ یا ده‌سته‌كا نوو یا ئێكه‌تیا كیك بۆكسینگا ئیراقێ هاته ئه‌نجامدان و تێدا چه‌ندین بابه‌ت و پلانێن سالا نوو هاتنه گه‌نگه‌شه‌كرن، ژبۆ رێكخستنا قاره‌مانیێن وه‌رزێ نوو بڕیارا هاته دان قاره‌مانیا سۆپه‌ر یا ئیراقێ كو ب هێزترین قاره‌مانیه بۆ 12 كێشێن جۆدا ل ئیراقێ دهێته كرن بریار هاته دان پارێزگه‌ها دهۆكێ دێ ل 15 شۆباتا بهێت مێڤانداریا وێ كه‌ت بۆ هه‌ردو سیسته‌مان فۆل كۆنتاك و كه‌ی وه‌ن ل سه‌ر ئاستێ پێشكه‌فتیان، گرنگیا ڤێ قاره‌مانیێ گه‌له‌ك ژبه‌ر كو باشترین یاریزانێن ل سه‌ر ئاستێ ئیراقێ و هه‌رێما كوردستانێ دێ پشكداربن و دیسان باشترین ده‌لیڤه‌یه یاریزانێن پارێزگه‌هێ و ئیدارا سه‌ربه‌خوه‌یا زاخۆ و یێن هه‌موو كوردستانێ پشكداریێ بكه‌ن پێخه‌مه‌ت وه‌رگرتنا پلێتا د ناڤ رێزێن هه‌لبژارتیێ ئیراقێ دا.
ژلایه‌كێ دووڤه ناڤهاتی دیار كر د كۆمبوونێ دا هاته په‌سه‌ند كرن قاره‌مانیا عه‌ره‌بی ل سه‌ر ئاستێ یانه‌یان بۆ پێشكه‌فتیان ل باژێرێ سلێمانیێ بهێته كرن و گۆت: بۆ داهاتی و یا دشیان دا بیت ئه‌م هه‌موو بزاڤا بكه‌ین ب پلانێن رێكخستی ئاستێ وه‌رزشا كیك بۆكسینگێ ل پارێزگه‌هێ و كوردستانێ به‌ر ب باشتر بچیت و دێ چه‌ندین پێنگاڤ ژی هێنه هاڤێتن.
