مه‌زنترین پرۆژێ سه‌ركێشێن گه‌شتیاری ل كوردستانێ دهێته چێكرن
ئه‌ڤرۆ، نه‌وزاد هلۆری:
جوانترین پرۆژێ سه‌ركێشێن گه‌شتیاری ل هه‌رێما كوردستان و عیراقێ ل هاڤینگه‌ها گه‌لیێ عه‌لی به‌گ ل سنوورێ قه‌زا سۆران دهێته چێكرن و پرۆژه‌ی قووناغێن باش ده‌رباسكرینه.
بارزان سۆران، رێڤه‌به‌رێ گه‌شت و گۆزارا سۆران بۆ رۆژناما ئه‌ڤرۆ گۆت: “پرۆژێ سه‌ركێشیێن گه‌شتیاری ل گه‌لیێ شادی د ناڤا هاڤینگه‌ها گه‌لیێ عه‌لی به‌گ دا ل سۆران ژلایێ كه‌رتێ تایبه‌ت ڤه دهێته چێكرن”.
زێده‌تر گۆت: “پرۆژه دبیته مه‌زنترین پرۆژێ گه‌شتیاری ل عیراق و كوردستانێ و ژ ب كارئینانا به‌له‌مێن یاریێن سه‌ركێشیان، سه‌فاران، زیبلاین، كافتریایێن هه‌لاویستی، كافتریا ل سه‌ر ره‌نگێ بورجێ ئیڤل پێك دهێت، دیسا چه‌ندین یاریێن ئاڤێ بۆ مه‌زن و زارۆیان، هه‌ر دیسا 40 مۆتێلێن گه‌شتیاری و كۆشك و كه‌پرێن گه‌شتیاری و خوارنێن بله‌ز، ل گه‌ل چه‌ند خزمه‌تگۆزاریێن دی، دێ تێدا هێنه چێكرن”.
ناڤبری دیار كر ژی كو د نوكه دا ده‌ست ب چێكرنا پرۆژه‌ی هاتیه‌كرن و كار تێدا یێ به‌رده‌وامه و گۆت: “هه‌كه چو ئاریشه نه‌هێنه پێش د ده‌مه‌كێ نێزیك دا پرۆژه دێ ب دووماهی هێت و كه‌ڤیته د خزمه‌تا گه‌شتیاران دا و ب هزاران ده‌لیڤێن كاری ژی بۆ وه‌لاتیان دێ دابین كه‌ت”.
