مه‌زنترین پڕۆژه‌یێ داشكاندنێ ل زانكۆیا زاخۆ ده‌ست پێكر
زاخۆ، دلۆڤان هالۆ:
بێریڤان محه‌مه‌د، ڕێڤه‌به‌را سه‌نته‌رێ گه‌شه‌پێدانا كاری ل زانكۆیا زاخۆ بۆ ڕۆژناما ئه‌ڤرۆ دیار كر كو ل ژێر درووشمێ (داشكاندن بۆ زانكۆیا زاخۆ) مه‌زنترین پڕۆژه‌یێ داشكاندنێ هاته ئه‌نجامدان، كو ئه‌ڤ جۆره پڕۆژه بۆ جارا ئێكێ یه ل سه‌رانسه‌ری هه‌رێما كوردستانێ دهێته ئه‌نجامدان، و تێدا ڕێككه‌فتن ل گه‌ل 30 سازی و كۆمپانی و جهێن بازرگانی هاتییه‌كرن، كو دێ هه‌لگرێن باجا زانكۆیا زاخۆ ژ قوتابی و فه‌رمانبه‌ر و مامۆستایان ژێ مفادار بن.
ڕێڤه‌به‌را سه‌نته‌رێ گه‌شه‌پێدانا كاری ئاماژه ب وێ چه‌ندێ ژی كر، ل ده‌مێ قوتابی و فه‌رمانبه‌ر و مامۆستایێن زانكۆیا زاخۆ سه‌ره‌دانا ئه‌ڤان سازی و كۆمپانی و جهێن بازرگانی یێن پشكدار دكه‌ن، بتنێ دێ باجا خوه یا زانكۆیێ نیشا ده‌ن و داشكاندن بۆ وان ب ڕێژا 10% هه‌تا 30% دێ هێته كرن، دیسا هه‌تا هه‌یڤا حه‌فت یا سالا بهێت ئه‌ڤ داشكاندنه دێ یا به‌رده‌وام بیت و گۆت: “گه‌له‌ك سازی و كۆمپانی و جهێن بازرگانی د ئه‌ڤی پڕۆژه‌یی دا پشكدارن، وه‌كو: كلینیكێن نۆشداری، ده‌رمانخانه، پێشانگه‌هێن جلكان، په‌رتووكخانه، خوارنگه‌هـ، پێشانگه‌هێن فرۆتنا كه‌لوپه‌لان و بازاڕێن ئۆنلاین، ناڤێن وان ژی د مالپه‌رێ زانكۆیێ دا هاتینه به‌لاڤكرن، ئارمانجا مه ی سه‌ره‌كی خزمه‌تكرنا قوتابی و فه‌رمانبه‌ر و مامۆستایێن زانكۆیا زاخۆیه، دیسا بارسڤككرنه بۆ وان د ئه‌ڤێ ڕه‌وشێ دا، مه ل به‌ره ڤی پڕۆژه‌یی به‌رفره‌هـتر لێ بكه‌ین و هه‌تا دهۆك و هه‌ولێرێ ژی ب خوه ڤه بگریت”.
