مه‌زنترین پێشانگه‌ها گه‌شت و گۆزارێ ل دهۆكێ دێ هێته‌كرن
ئه‌ڤرۆ، نه‌وزاد هلۆری:
رێڤه‌به‌ریا گشتی یا گه‌شت و گۆزارێ ل پارێزگه‌ها دهۆكێ ب پشكداریا پڕانیا دام و ده‌زگه‌هێن كارگێری، به‌رهه‌ڤیان بۆ ئه‌نجامدانا مه‌زنترین پێشانگه‌ها گه‌شت و گۆزاری ل كوردستانێ دكه‌ت كو بڕیاره ل27/9/2021 ل دهۆكێ بهێته ڤه‌كرن.
د. خه‌یری عه‌لی، رێڤه‌به‌رێ گشتی یێ گه‌شت و گۆزارا پارێزگه‌ها دهۆكێ بۆ رۆژناما ئه‌ڤرۆ گۆت: “ب هه‌لكه‌فتا رۆژا جیهانیا گه‌شت و گۆزارێ، ئه‌م ب هه‌ڤكاری ل گه‌ل وه‌زاره‌تا چاندن و كارگێریا پارێزگه‌هێ و ده‌سته‌یا گه‌شت و گۆزارێ و دام و ده‌زگه‌هێن دی یێن كارگێری ل دهۆكێ و پشكه‌ك ژ خودان ئۆتێل و مۆتێل و جهێن گوزاری ل عیراقێ، مه‌زنترین پێشانگه‌ها گه‌شت و گۆزارێ ل سه‌ر ئاستێ كوردستانێ بۆ جارا ئێكێ ل دهۆكێ دێ هێته ئه‌نجامدان، پێشانگه‌ه بۆ ده‌ما سێ رۆژان دێ یا به‌رده‌وام بیت، دیسا هه‌ر د چارچوڤێ پێشانگه‌هێ دا، مه ستراتیژیه‌كا هه‌ری ب هێز بۆ كه‌رتێ گه‌شت و گۆزاری دانایه و ده‌ما هه‌شت هه‌یڤان ئه‌م پێڤه بووین و نوكه ب داوی هاتیه”.
زێده‌تر گۆت: “مه دڤێت روویێ جوان یێ پارێزگه‌ها دهۆكێ د هه‌موو بیاڤان دا بۆ جیهانێ و كوردستانێ دیار بكه‌ین، د پێشانگه‌هێ دا هه‌موو ده‌ڤه‌رێن كوردستانێ پشكدارن و هه‌موو پێكهاته و ته‌خێن جڤاكی پشكدارن، له‌و ئه‌ڤه ده‌رفه‌ته‌كا مه‌زنه ل هه‌مبه‌ر پیشه‌كار و هونه‌رمه‌ند و جهێن گه‌شتیاری و بیاڤێن دی كو شیانێن خوه نیشان بده‌ن”.
ناڤبری دیار كر، ئه‌ڤ ساله پتری 300 هزار گه‌شتیاران قه‌ستا پارێزگه‌ها دهۆكێ كریه و پترین رێژه ژی ل هه‌یڤا حه‌فت بوویه.
