((مه‌سعود بارزانی)) دێ چیته ((كۆبانێ))
ئه‌ڤه نه نووچه‌یه‌ك نوویه و ئه‌ز نه نووچه‌سازم, من چ ژێده‌ر و چاڤكانیێن نه‌په‌نیێن هه‌واڵ و نووچه‌یان نینن داكو بكارم خوینه‌رێن هێژا پشت ڕاست بكه‌م, لێ به‌لێ ئه‌ڤه هزر و ڕامانه‌ك كوور و دووره و ده‌مه‌ك درێژه ئه‌ز د وان بۆچوونان دا دژیم و خوه‌زیا ئه‌وێ روَژێ دخوازم و چاڤه‌رێمه كه‌نال و شاشه‌ێن تی ڤی و میدیاێن ناڤخوه و بیانی ڕاپوَرت و ریپوَرتاجان ل سه‌ر به‌ڵاڤبكه‌ن. ئه‌رێ گه‌لوَ ما دێ چ بیت ئه‌گه‌ر د ئێڤاریا شه‌ڤا نه‌ڤروَزا ئه‌ڤ ساله دا مه‌سعود بارزانی سه‌روَكێ هه‌رێما كوردستانێ د ناڤ باژێرێ (شنگال) ێ دا خه‌تیرا ئاگرێ نه‌ڤروَزێ هه‌لكر!! پا هه‌كه د بیره‌وه‌ریا 54 ساڵییا شوَره‌شا ئیلۆنا مه‌زن دا, ئه‌ڤ ساڵ ل چه‌ق و ناڤه‌ندا باژێرێ (كوَپانێ) گۆتارا ئێكبوون و ئێكرێزیا گه‌لێ كورد بده‌ت و هه‌ر ل وی باژێری بانگه‌وازا ئێكگرتنا كوردستانێ و گرێدانا كوَنگرێ نه‌ته‌وه‌یی ڕابگه‌هینیت، گه‌لوَ دێ چ رووده‌ت؟!. مه‌ره‌ما من ژ ڤان هه‌ردو پێشبینییان ئه‌وه داكو ئه‌م بزانین بۆیه‌ر و روودان و گوهۆرینان ل سه‌ر هه‌ردو ئاستێن نێڤده‌ولی و ده‌ڤه‌ر و هه‌رێمێ گه‌له‌ك ب له‌ز و به‌ز و خێرا بڕێڤه دچن و پێدڤیه كوردستانێ ژی خوَه بوَ ئه‌ڤان گوهرینكاریێن بله‌ز ئاماده و به‌رهه‌ڤ بكه‌ن , نه‌وه‌ك ئه‌ڤێجارێ ژی وه‌كی خاپاندنێن به‌ری سه‌دساڵێن بوری , جاره‌ك دن شه‌مه‌نده‌فه‌ڕا سه‌رخه‌بوون و ئازادیێ گه‌لێ مه ژ ئێكه‌م ووێستگه‌ه بهێلیت. هه‌كه كه‌سه‌ك وێ پرسێ ژ من بكه‌ت و بێژیت چما (مه‌سعود بارزانی) و باژێرێ (كوَبانێ) ژ بوَ ڤێ پرسگرێكا گرنگ و چاره‌نڤیساز هه‌لدبژێری؟ ژ بوَ به‌رسڤێ ئه‌ز نه‌چارم بزڤڕم بۆ بۆیه‌رێن به‌ری چه‌ند مه‌هان, ده‌مێ به‌رێز (لاریجانی) سه‌روَكێ په‌رله‌مانێ ئیرانێ سه‌ره‌دانا هه‌ڤلێرێ كری و داخواز, ئانكو پێشنیاز بۆ سه‌روَكێ هه‌رێمێ كری سه‌ره‌دان و په‌یوه‌ندی و گه‌نگه‌شه‌یان ل گه‌ل رژێما سووریا و به‌شار ئه‌سه‌دی بكه‌ت، لێ بارزانی بێی دودلی و ب شێوازه‌ك دیپلۆماتی و وه‌كی لایه‌نه‌ك ژ هه‌ڤپه‌یمانیا نێڤده‌وله‌تی ئه‌ڤ داخوازه ب ئاشكه‌را و زه‌ڵاڵ ڕه‌تكر. ڕاستی ب دیتنا من ئه‌ڤێ داخوازێ بێهنا جوَره‌ك ژ پیلان و نیازپیسیێ لێدهات, له‌وڕا ڕه‌تكرنا وێ دربه‌ك سیاسی و دیپلوَماتی و ڕه‌نگه سه‌ربازی ژی بوو. چونكی ئه‌ڤروسَ نه‌په‌سه‌نده سیاسه‌تڤان دژی ته‌وژم و ته‌یارێ سه‌رده‌می پێنگاڤان بهاڤێت, ئیران و هه‌می دونیا ژی ڤێ ڕاستیێ باش دزانیت. ل هه‌مبه‌ر ڤان هه‌ڵوێستێن نیشتمانیێن مه‌سعود بارزانی دا و د گه‌رمه گه‌رما شه‌ڕێ كه‌فتن و نه‌كه‌فتنا (كوَبانێ) دا, (وه‌لید ئه‌لموعه‌لیم) ێ وه‌زیرێ ده‌رڤه‌یێ سووریێ هاته سه‌رخه‌ت و نه‌شاره‌زا ژ تیتاڵ و نه‌ریتێن دیپلوَماتیا جیهانێ و دوور ژ ره‌وشت و سنجێن جڤاكی و سیاسی، وه‌كی كه‌سه‌كێ هێستریایی چه‌ند شه‌كره‌ك هه‌مبه‌ری مه‌سعود بارزانی شكاندن و سوَزا شكاندنا كه‌ساتیا بارزانی د كه‌فتنا باژێرێ (كوَبانێ)دا دابوو. لێ به‌روڤاژی خه‌ون و حه‌ز و ئاره‌زووێن (موعه‌لیم), بارزانی ل (كوَبانێ) نه‌ك هه‌ر نه‌شكه‌ست, به‌لكی مه‌زنترین سه‌ركه‌فتن و سه‌روه‌ری ب ده‌ستڤه‌ئانی و هه‌تا نها چاره‌مین ده‌سته‌ێن هێزێن پێشمه‌رگه‌ێن كوردستانێ ل به‌رخودان و ئازادبوونا (كوَبانێ) دا پشكداربوونه. گرنگرترین په‌یام و داخویانی و پشته‌ڤانی ژی بوَ ئاڤه‌دانكرن و دوباره نووژه‌نكرن و پێشڤه‌برنا (كوَبانێ) ژ لایێ مه‌سعود بارزانی سه‌روَكێ هه‌رێما كوردستانێ هاتیه ڕاگه‌هاندن. داكو ئێدی (موعه‌لیم) و چ لایه‌نێن (داعش ساز) و كه‌سێن دن وێره‌كیا شكاندنا سه‌روه‌ریا كورد و كوردستانێ نه‌كه‌ن, دخوازم سه‌روَكێ هه‌رێمێ و سه‌روَكاتیا هه‌رێمێ ل (كوَبانێ).. . ل (شنگال)ێ حزۆر و ئاماده‌بوونه‌ك هه‌بیت و ل وێرێ ئێكگرتن و ئێكبوون و كوَنگره‌یا نه‌ته‌وه‌یی ڕابگه‌هینیت.
