مه‌سعود عارف: فلمه فیسته‌ڤالا دهۆكێ نوونه‌راتیا ناسناما مه یا كوردستانی دكه‌ت
دهۆك، زنار تۆڤی:
سینه‌ماكار(مه‌سعود عارف) د دیداره‌كێ دا بۆ رۆژناما ئه‌ڤرۆ گۆت: فلمه فیسته‌ڤالا دهۆكێ ژ ئاستێ لۆكالی و هه‌رێما كوردستانێ ژی ده‌ركه‌فتیه، پشتی هه‌شت گه‌ڕێن ڤێ فیسته‌ڤالێ، فلمه فیسته‌ڤالا دهۆكێ بوویه فیسته‌ڤاله‌كا نه‌ته‌وه‌یی ل سه‌ر ئاستێ هه‌ر چار پارچێن كوردستانێ، هه‌ر ژ گه‌را ئێكێ هه‌تا نوكه، فلمه فیسته‌ڤالا دهۆكێ گه‌له‌ك گرنگییێ ب پشكا فلمێن كوردی دده‌ت، ئه‌ڤه وێ چه‌ندێ دگه‌هینیت كو ئه‌ڤ فیسته‌ڤاله پشته‌ڤانییێ ل فلمێن كوردی ل هه‌ر چار پارچێن كوردستانێ دكه‌ت و گه‌هشتیه ئاسته‌كێ نێڤده‌وله‌تی یێ گه‌له‌ك باش، هه‌روه‌سا (فێبریسك) رێكخراوه‌كا ره‌خنه‌گرێن سینه‌مایێ یه ل جیهانێ، جهێ خوه دناڤ فلمه فیسته‌ڤالا دهۆكێ دا كریه، سالانه خه‌لاتێ خوه پێشكێشی فلمه‌كێ كوردی دكه‌ن، دیسان ئه‌ڤه چه‌ندین ساله فلمه فیسته‌ڤالا دهۆكێ بوویه بالیۆزا ئیراقێ بۆ هه‌لبژارتنا فلمان و هنارتنا وان بۆ (ئاسیا پاسیفیك).
ناڤهاتی گۆت: ب دیتنا من هه‌موو فیسته‌ڤالێن ل كوردستانێ هاتینه كرن، به‌ری فلمه فیسته‌ڤالا دهۆكێ بهێته ئه‌نجامدان، د لۆكالی بوون، به‌لێ پشتی فلمه فیسته‌ڤالا دهۆكێ هاتیه د مه‌یدانێ دا، شیایه كاره‌كێ نموونه‌یی بكه‌ت، هه‌روه‌سا دناڤ رۆژهه‌لاتا ناڤین ژی دا، ره‌نگڤه‌دان و ده‌نگڤه‌دانا فلمه فیسته‌ڤالا دهۆكێ هه‌یه، له‌ورا دڤێت ئه‌م خوه ل فلمه فیسته‌ڤالا دهۆكێ بكه‌ینه خودان، چونكی ئه‌ڤ فیسته‌ڤاله نوونه‌راتییا ناسناما مه یا كوردستانی دكه‌ت.
