مه هونهرهكێ پاقژ دڤێتن
شاكر ئهتروشی
وهكو ئێك ژ حهزژێكهرێن هونهرێ كوردی، ب تایبهت ژی ستران و كلیپ و درامایان، بۆ دهمێ چهندین سالانه ئهز ژ نێزیك بینهری و گوهداریا وان بهرههمان دكهم، ب تایبهت ئهوێن ل سنۆرێ پارێزگهها دهۆكێ دهێنه چێكرن، مهرهما من (ستران و شێوێ كلیپكرنێ و هندهك فلم و درامانه ئهوێن ل سهر شاشهیێن كهنالێن كوردی دهێنه نیشادان، ئهز نابێژم ههموو دلاوازن یان دبێ ئاستن، من رێز بۆ هندهكان ههنه كو بهرههمێن وان دباشن، لێ یێن دی ههموو دخراب و نزمن و ب چو رهنگان خزمهتا هونهرێ كوردی ناكهن، بۆ نموونه هندهك ستران بهلاڤ دبن پهیڤێن وان د ساده و ساكار و دڤالانه، ئاواز ژی پتریا وان د دزی نه، یان ژی ب زیرهكیا دهستكرد دهێنه چێكرن و سترانبێژ دێ بێژیت (ئهڤا ئاوازا منه) پێدڤی ناكهت ئهز نموونهیان بینم، چنكو خواندهڤان دزانن مه بهحسێ كێیه و كییه وهدكهت، ههروهسا سترانبێژ ب خۆ ژی دزانن من بهحسێ كێیه و بڤێ بهرهللایێ ههر چهند رۆژان یان ههیڤێ جارهكێ بهرههمهكێ وهسا یێ ئاست نزم یێ بهلاڤ دبیت، لهورا یا گرنگه ئهم ههموو پێكڤه، بهری ههموویان ژی رێڤهبهریا رهوشهنبیری و سهندیكا هونهرمهندان ڕێگریێ ل وان بهرههمێن بهلاڤ بكهن و نههێلن بهلاڤ ببن و ههكه رێڤهبهریا رهوشهنبیری یان سهندیكایا هونهرمهندان نهشێن كنترۆلێ ل سهر وێ چهندێ بكهن، یان بێژن ئهڤه كارێ مه نینه، ئهز دبێژمه وان پا كارێ ههوه چیه و ههكه هوون ڤێ نهكهن پا ههبوونا ههوه چ ڕامان ددهت؟
لهورا گهلهك یا گرنگه ئهڤرۆ بهری ببیته سوبههی ئهو ههردو لایهن ل سهر ئاستێن بلند(رێڤهبهرێ گشی یێ رهوشهنبیری و بهرپرسا سهندیكا هونهرمهندان) پێكڤه روونن و لژنهیهكا باش ژ چهند هونهرمهندێن باش و خودان شیان پێكڤه روونن و باشه پهیوهندی ل گهل ئێكهتیا نڤیسهران ژی ههبیت كو لژنهیهكا ههلسهنگاندنا سترانان ژوان بیت و ئهوێن دی ئاواز و دهنگ و مۆزیكێ ب ههلسهنگینن و ههر سترانهكا مهرجێن دروست تێدا نهبن، بلا ڕێ نهدهنێ بهلاڤ ببیت، ههروهسا بۆ فلم و درمایان ژی ههمان رێكار ههبن و بڤی رهنگی دێ شێن كنترۆلێ ل سهر بهرههمێن لاواز كهن، ههروهسا دێ هونهرێ مه ژی پاقژتر لێ هێت و وهكو بینهر و گوهدار ژی مه مافێ ههی بێژین (مه هونهرهكێ پاقژ دڤێتن).
