مه پێدڤی ب چ سرووده‌كێ هه‌یه؟
ده‌ما دلدارێ هه‌لبه‌ستڤان تێكستا (ئه‌ی ره‌قیب) نڤیسی، ژیێ وی بیست سالی بوو و د زیندانێن شایێ ئیرانێ دا بوو، ئه‌ڤ چه‌نده ژی گه‌له‌ك ئاخفتنان هه‌لدگریت، یه‌كه‌م ئه‌ڤ تێكسته ژ بۆ رژێما ئیرانی و ئه‌و ده‌وله‌تێن دی یێن كو كوردستان داگیركربوون هاتبوو ئاراسته‌كرن. هه‌ر چه‌نده به‌رخوه‌دان د هه‌لبه‌ستا وی دا هه‌یه، لێ به‌رخوه‌دانا د هوندری زیندانێ دایه، مینا وێ به‌رخودانێ نینه ئه‌وا د به‌رۆكێن شه‌ڕی دا دهێته كرن، هه‌لبه‌ت ئه‌گه‌ر ل سه‌رده‌مێ شۆرشێ ئه‌ڤ تێكسته ب هاتبا نڤیسیناندن، ب ستایل و فۆرمه‌كێ دی دبوو، كو پتر كار بیت نه كارڤه‌دان. مرۆڤێ زیندانكری پتر ب گۆتنان هه‌لۆێستێ خوه خویا دكه‌ت، لێ ده‌ما كو د شۆرشێ دا به و چه‌ك بده‌ست به، ب شێوازه‌كێ خورتر و جیاوازتر هه‌بوونا خوه نیشادده‌ت. د زیندانێ دا مرۆڤ هه‌ست ب بێ هێڤیبوون و بێ چاره‌یێ دكه‌ت، زیندان وه‌ك گۆره‌پانا جه‌نگ نییه كو گرتی و جه‌نگاوه‌ر هه‌ر ئێك ژ وانا د پێگه و ره‌وشه‌كا جودا دانه، جه و ده‌م و پێگه باندۆر بۆ سه‌ر هه‌لۆیست و چاوانیا خوه ده‌رخستن و مه‌تۆدێ گۆتار و بكارئینانا په‌یڤ و سه‌مبۆل و دروستكرنا رسته‌یان هه‌یه. ناڤه‌رۆك خویاكرنا حاله‌تێ سایكولۆژی و ده‌روونیێ مرۆڤه. ده‌ما دلدارێ شاعیر ئه‌ڤ تێكسته نڤیسی ژیێ وی بیست سالی بوویه، له‌وما دكارین بێژین ئه‌و وه‌ك شاعیر خۆدان ئه‌زموون نه‌بوویه یان ژی ل ده‌ستپێكا كارێ خوه‌یێ ئه‌ده‌بی بوویه، ل وی ده‌می هه‌تا نها گه‌له‌ك گوهه‌رتنێن مه‌زن د پێڤاژویا ته‌ڤگه‌را رزگاریخوازیا گه‌لێ كورد روودانه. بۆ میناك ل سه‌رده‌مێ دلدارێ شاعیر خه‌باتا چه‌كداری نه‌بوویه و په‌یڤا پێشمه‌رگه د فه‌رهه‌نگا زمانێ كوردی دا نه‌بوویه. ئه‌گه‌ر ئه‌وده‌م په‌یڤا پێشمه‌رگه ب ته‌ڤ رامانێن خوه یێن شۆرشگیری د ئه‌ده‌بیاتا زمانێ كوردی دا هه‌با، گرنگی ژێره ددا و د تێكستێن خوه ده گه‌له‌ك پێداگری ل سه‌ر رۆلێ پێشمه‌رگه دكر و بیاڤه‌كا به‌رین ژێره ته‌رخان دكر. نها مافێ نه‌ته‌وه و پێكهاته‌یێن كوردستانێ هه‌یه پرسیارێ بكه‌ن، ئه‌رێ سروودا (ئه‌ی ره‌قیب) سرووده‌كا نیشتیمانیه، یان ژی سرووده‌كا نه‌ته‌وی یا كوردایه؟ ئه‌مێن كوردستانی ب سروودا نیشتیمانیا عیراقی رازی نین كو چ سیما و تایبه‌تمه‌ندیێن كورد و كوردستانێ تێدا نینه. پێویسته به‌ری پێكهاته‌یێن كوردستانێ، ئه‌م وه‌ك نه‌ته‌وا بالاده‌ست ل كوردستانێ داخوازا سه‌رراستكرنا سروودا نیشتیمانی بكه‌ین. د ڤێ ده‌سته‌لاتا كوردی ڤێ ده‌ستپێشخه‌لیێ بكه‌ت و گوهه‌رتنێ ل سروودا (ئه‌ی ره‌قیب) بكه‌ت ب شێوازه‌كێ گۆنجایی دگه‌ل ڤێ گاڤا دیرۆكیا كو ئه‌م تێدا دژین. چاره‌سه‌ركرنا ڤێ پرسێ پێویستی ب پێكئانینا لیژنه‌یه‌كا پسپۆر هه‌یه ژ بۆ پێداچوون ل سه‌ر ناڤه‌رۆكا سروودا ئه‌ی ره‌قیب كو دڤێ ریتما وێ وه‌ك خوه بمینه، ژبه‌ركو ئاواز و ریتما وێ د بیردانكا مه دا جهگیر بوویه. گوهه‌رتنا ناڤه‌رۆكا سروودا نیشتینانی كریاره‌كا ئاسایی و پێدڤی یه، گه‌له‌ك وه‌لاتان پێداچوون ل سه‌ر ئالا و سروودا نیشتیمانی كرنه
