مووسل یا نێزیكی كاره‌ساته‌كێ دبیت
ئه‌ڤرۆنیۆز، ئه‌یاد به‌رواری
بۆ رۆژا ده‌هێ یه ئاڤ ل گه‌له‌ك تاخێن باژێرێ مووسلێ نه‌هاتی و وه‌لاتیێن مووسل ژی دترسن نه‌خوه‌شی په‌یداببن.
ژێده‌ره‌كی ژ مووسل بۆ سایتێ (الخلیج اونلاین) دیاركر” وه‌لاتیێن لایێ چه‌پێ ژ مووسلێ یێن دبن گه‌فا كاره‌ساته‌كا مرۆڤایه‌تی، هه‌كه بڕینا ئاڤا ڤه‌خوارنێ به‌رده‌وام بیت”.
ژێده‌رێ ناڤبری گوت ژی” رێكخستیا داعشێ ئاگه‌ه ژ ره‌وشا ئاكنجیێن مووسلێ نینه یێن كو رۆژا ده‌هێ یه ژ بێ ئاڤیێ دنالن و تنێ بۆ وێ رێكخستیێ ئه‌ندامێن وێ و خێزانێن وان د گرنگن”.
وه‌لاتیه‌كێ دی ژ مووسلێ بۆ (الخلیج اونلاین) دیاركر” ره‌وش ل مووسل گه‌له‌ك یا خرابه و ژیان گه‌له‌ك یا ب زوحمه‌ت بووی دبن سیبه‌را رێكخستیا داعشێ و به‌رده‌وامیا بڕینا كاره‌بێ و ئاڤێ ژ گه‌له‌ك تاخێن مووسلێ ترس ل ده‌ڤ ئاكنجیێن باژێری په‌یدا كریه كو ره‌وش خرابتر ببیت و نه‌خوه‌شی په‌یدا ببن ب تایبه‌تی ژی مووسل ژ كێمبوونا ده‌رمانان و تیمێن نوژداری یێن تایبه‌تمه‌ند دنالیت”.
خویاكر ژی” رێكخستیا داعشێ ل ڤێ دووماهیێ لایه‌نێ خزمه‌تگوزاری ل مووسلێ یێ پشت گوه هاڤێتی و پتر گرنگیێ ب پرسا مه‌شقدانا چه‌كدارێن خوه دكه‌ت وه‌كو به‌رهه‌ڤكرنه‌ك بۆ شه‌ڕێ مووسلێ”.
وی ژێده‌ری ئاماژه دا كو ئاكنجیێن مووسلێ په‌نایێ بریه كولانا بیرێن ئاڤێ بۆ بده‌ستڤه‌ئینانا ئاڤا ڤه‌خوارنێ، هه‌رچه‌نده گه‌له‌ك جاران ئه‌و ئاڤ بۆ ڤه‌خوارنێ یا باش نینه ژبه‌ركو كبریت یا تێدا و بهایێ كوانا ئێك بیرا ئاڤێ 750 دۆلارن”.
وه‌لاتیه‌كێ دی دیاركر كو وی ده‌ست ب كڕینا ئاڤا دلوپكری كریه، به‌لێ ئه‌و نه‌شێت به‌رده‌وام وێ ئاڤێ بكڕیت و گه‌له‌ك وه‌لاتیێن مووسلێ ژی نه‌شێن به‌رده‌وام ئاڤا دلوپكری بكڕن و گه‌له‌ك خێزانان ژی بهایێ كولانا بیرا ئاڤێ دناڤ مالێن خوه‌دا نینه”.
