مووچێ شه‌هیدێن شه‌ڕێ داعشێ دێ چیته سه‌ر ب وه‌زاره‌تا شه‌هیدان ڤه
هه‌ولێر، قائید میرۆ:
پشتی چه‌ندین سالان حوكمه‌تا هه‌رێما كوردستانێ بڕیار دایه مووچێ شه‌هیدێن شه‌ڕێ داعشێ ل سه‌ر میلاكێ وه‌زاره‌تا پێشمه‌رگه‌ی بۆ سه‌ر وه‌زاره‌تا شه‌هیدان بهێته ڤه‌گوهاستن و جێگرا سه‌رۆكا لیژنا شه‌هید و ئه‌نفالكریان ژی ل په‌رله‌مانێ كوردستانێ ئاشكرا كر، راسته دێ مووچێ وان پیچه‌كێ كێمتر لێهێت، به‌لێ دێ ژ چه‌ندین ماف و شایسته‌یێن دی مفادار بن.
ژیان تاهر زێوه‌ی، جێگرا سه‌رۆكا لیژنا شه‌هید و ئه‌نفاكریان ل په‌رله‌مانێ كوردستانێ بۆ رۆژناما ئه‌ڤرۆ دیار كر، باده‌كا شه‌هیدێن شه‌ڕێ به‌رهنگاریا داعشێ هه‌تا نوكه ل سه‌ر میلاكێ وه‌زاره‌تا پێشمه‌رگه‌ی بوویه، به‌لێ لیستا شه‌هیدێن شه‌ڕێ به‌رهنگاریا داعشێ بۆ سه‌ر میلاكێ وه‌زاره‌تا شه‌هید و ئه‌نفالكریان دێ هێته ڤه‌گوهاستن و گۆت: “ئه‌گه‌رێ ڤێ چه‌ندێ كو هه‌تا نوكه مووچێ وان شه‌هیدان ل سه‌ر وه‌زاره‌تا پێشمه‌رگه‌ی بوویه بۆ ڤێ چه‌ندێ ڤه‌دگه‌ڕیت، مووچێ وان ل وه‌زاره‌تا پێشمه‌رگه‌ی ژ وه‌زاره‌تا شه‌هیدان باشتربوویه، له‌وڕا هه‌تا نوكه مووچێ وان شه‌هیدان ژلایێ وه‌زاره‌تا پێشمه‌رگه‌ی ڤه دهاته مه‌زاختن”.
ژیان تاهر زێوه‌ی گۆتژی: “راسته ب ڤه‌گوهاستنا لیستا وان بۆ سه‌ر وه‌زاره‌تا شه‌هیدان، مووچێ وان دێ كێمتر لێهێت، چونكو مووچێ شه‌هیدان یێ دیاره، به‌لێ د هه‌مبه‌ر دا چه‌ندین و ماف و شایسته‌یێن دی هه‌نه ژلایێ وه‌زاره‌تا شه‌هیدان ڤه بۆ كه‌سوكارێن شه‌هیدان و كه‌سوكارێن شه‌هیدێن شه‌ڕێ داعشێ ژی دێ ژێ مفادار بن، وه‌كی وه‌رگرتنا پارچێن ئه‌ردی و مه‌زاختنا كرێیا خواندنێ و چاره‌سه‌ریێن نۆشداری و چه‌ندین ماف و شایسته‌یێن دی ژی هه‌نه”.
