مووچێ شه‌هیدێن شه‌ڕێ داعشێ كه‌فته سه‌ر وه‌زاره‌تا شه‌هیدان
هه‌ولێر، قائید میرۆ:
پشتی چه‌ندین سالان مووچێ شه‌هیدێن شه‌ڕێ به‌رهنگاربوونا داعشێ كه‌فته سه‌ر وه‌زاره‌تا شه‌هیدان و بریكارێ وه‌زاره‌تا كاروبارێن شه‌هید و ئه‌نفالكریان ژی دبێژیت: ئه‌ڤرۆ 31/1/2022 دێ كه‌سوكارێن شه‌هیدێن شه‌ڕێ داعشێ بۆ جارا ئێكێ مووچێ خوه دگه‌ل وه‌زاره‌تا شه‌هیدان وه‌رگرن.
به‌ڕه‌ڤان حه‌مدی، بریكارێ وه‌زاره‌تا شه‌هید و ئه‌نفالكریان بۆ رۆژناما ئه‌ڤرۆ دیار كر، د چارچوڤێ بجهئینانا قانوونا چاكسازیێ دا و پشتی هووربینی بۆ باده‌كا وان هاتیه كرن، مووچێ هزار و 18 شه‌هیدێن شه‌ڕێ به‌رهنگاربوونا داعشێ ل سه‌ر میلاكێ وه‌زاره‌تا پێشمه‌رگه‌ی بۆ سه‌ر میلاكێ وه‌زاره‌تا كاروبارێن شه‌هیدان هاتیه ڤه‌گوهاستن، به‌لێ هه‌ژماره‌كا باده‌كان ماینه و هێشتا ب دووماهی نه‌هاتینه و گۆت: “پشتی هووربینیان و پشتڕاستبوونێ دێ بڕیار ل سه‌ر هێته‌دان، ئه‌ڤرۆ كه‌سوكارێن شه‌هیدێن شه‌ڕێ داعشێ دێ مووچێ خوه دگه‌ل وه‌زاره‌تا شه‌هیدان وه‌رگرن”.
به‌ڕه‌ڤان حه‌مدی ئاماژه ب وێ چه‌ندێ ژی كر كو بڕیاره د ده‌مێ دو حه‌فتیێن داهاتی دا باده‌كا شه‌هیدێن سه‌ر ب وه‌زاره‌تا ناڤخوه‌ڤه ژی بۆ سه‌ر وه‌زاره‌تا كاروبارێن شه‌هیدان بهێنه ڤه‌گوهاستن و گۆت: “ڤه‌گوهاستنا میلاكێ ناڤێن شه‌هیدان بۆ سه‌ر وه‌زاره‌تا شه‌هیدان، ئه‌ڤه‌ژی ل گوره‌ی بڕگا پێنجێ یه، بێگومان ڤه‌گوهاستن ژی ل سه‌ر فه‌رمانا سه‌رۆكایه‌تیا جڤاتا وه‌زیرێن هه‌رێما كوردستانێ بوویه”.
