مووچەیێ چار هزار و 400 كێم ئەندامێن ئاكرێ یێ هاتیە راگرتن
صەباح زوهێر زێباری:
رێڤەبەریا چاڤدێری و گەشەپێدانا جڤاكی ل ئاكرێ دیار كر، نها دەست ب چێكرنا سەتنەرەكی بۆ نەخۆشێن ئوتیزمێ ل ئاكرێ دهێتەكرن كو 40%ێ پرۆژە تەمامبوویە، هەروەسا ل هەردوو قەزایێن ئاكرێ و بەردەش 2867 كێم ئەندام موچێ هەیڤانە وەردگرن، هەروەسا 4400 كەس ئەوێن بن ناڤێ چاڤدێریا خێزانی هەنە، لێ ل سالا 2015 هەتا نها موچێ وان هاتیە راگرتن.
غازی محمد تاهر، رێڤەبەرێ چاڤدێری و گەشەپێدانا جڤاكی ل ئاكرێ بۆ رۆژناما ئەڤرۆ دیاركر، ل رێڤەبەریا مە دوو بەش هەنە، ئەو ژی بەشێ (كێم ئەنداما و بەشێ چاڤدێریا خێزانی)، ئەو كێم ئەندامێن هاتینە توماركرن هەتا سالا 2013ێ هەمی خودان موچەنە و بەردەوام موچێ خوە وەردگرن كو ل سنورێ رێڤەبەریا مە كو هەردوو قەزایێن ئاكرێ و بەردەش بخۆڤەدگریت 2867 كێم ئەندامێن ڤی شێوەی هەنە، هەروەسا پشتی سالا 2013 هەتا نوكە نێزیكی دو هزار كێم ئەندامێن دی هاتینە توماركرن وەكو كێم ئەندام و لیژنێ رێژا كێم ئەندامیا وی ژی دیاركریە و رێكارێن كارگێری و ساخلەمی هاتینە رێڤەبرن و گەهشتینە وەزارەتا كاروبارێن كومەلایەتی و خودان پێدڤیێن تایبەت، لێ كێشا دارایی بوویە رێگر موچە بۆ وان نەهێتە دابینكرن.
گۆت ژی: بەشێ دی چاڤدێریا خێزانی بخۆڤەدگریت ئەو ژی كەسێن (دانعەمر، دایكە هێتیم، زارۆیێن بێ دایك و باب ل بن 18 سالیێ، قوتابیێ خێزاندار، خێزانا حكومدار، كەسێن نەخوش) كو ل سنورێ رێڤەبەریا مە هەتا 4400 كەسن، ئەو ژی ل مەها 9 یا سالا 2015 هەتا نوكە موچێ وان هاتینە راگرتن، ئەو ژی ژبەر كێشێن دارایی پارێ وان هاتیە راگرتن، هەتا بارودوخ دروست بیت ئەم وێ باوەریێ نە دێ حكومەتا مە موچێن وان دووبارە دەست پێكەتەڤە.
سەبارەت نەخۆشێن ئوتیزمێ ناڤهاتی گۆت: ل سنورێ رێڤەبەریا مە دوو قەزایان بخوڤەدگریت 99 نەخوشێن ئوتیزمێ یێن توماركری هەنە كو مەهانە موچی 150 هزاران وەردگرن.
زێدەتر گۆت: ئاریشا مە یا سەرەكی بۆ ڤان نەخۆشان نەبوونا سەنتەرەكی بوو، لێ ب خوشحالیڤە نها كار ل سەر چێكرنا سەنتەرەكێ دهێتەكرن و كوژمەكێ پارەیی بۆ هاتیە دابینكرن كو پرۆژە نها هەتا 40%ێ تەمامبوویە و كاركرن تێدا یا بەردەوامە و ئەم وێ باوەریێ نە هەتا دووماهیا ئەڤ سالە دێ پرۆژە ب داوی هێت.
گۆت ژی: بێگومان ئەڤ سەنتەرە دێ شێت خزمەتا وان نەخوشان كەت و دێ شێت بارێ وان سڤكتر كەت، چونكی مە گەلەك نەخوش یێن هەی بارێ دارایی یێ مالا وان یێ باش نینە و شیان نینە قەستا باژێرێن دی بكەن، لەوا ڤەكرنا ڤی سەنتەرەی دێ بارێ وان سڤكتر كەت و شێین پتر خزمەتا وان كەین.
