مژوولی كومكرن و ئه‌رشیفكرنا سترانێن فولكلۆری یه
دهۆك، شاكر ئه‌تروشی:
سترانبێژێ كۆچك و دیوانان (عه‌بدولهادی ئیبراهیم ئیسماعیل) كو ب (بابێ ئه‌رده‌وانی) دهێته نیاسین، د دیداره‌كێ دا بۆ رۆژناما ئه‌ڤرۆ دیاركر كو دژیه‌كێ بچووكدا حه‌زا سترانگۆتنێ ل ده‌ف هه‌بوو، ب تایبه‌ت ژی سترانێن فولكلۆری و گه‌له‌ك داخباری ده‌نگێ سترانێژ (عه‌بدولێ ده‌نگێژ) بوو، و ئه‌و چه‌نده بۆ ئه‌گه‌ر كو ئه‌و ژی سترانێن وی بێژیت و هه‌تا نوكه یێ به‌رده‌وامه و پشتی هاتیه دهۆكێ دو ئه‌لبۆمێن وان سترانان تۆماركرینه.
بابێ ئه‌رده‌وانی گۆت: عه‌بدولێ ده‌نگێژ خه‌لكێ باژێرێ سێرتێ بوو ل باكورێ كوردستانێ، ژبه‌ر زۆلم و زۆریا توركان ل وی سه‌رده‌می ل سالا 1946 ب خێزانڤه ئاواره‌ی رۆژئاڤایێ كوردستانێ ببوون، و خه‌باتا خوه یا هونه‌ری ل رۆژئاڤا به‌رده‌وام دكر هه‌تا سالا 1982 چوویه به‌ردلوڤانیا خودی و ب راستی ژی ئه‌و پاشخانه‌كا سترانێن فولكۆری بوو، بۆ زانین ئه‌ز عود و بزق و ته‌مبیرێ دژه‌نم، لێ ناچمه ده‌واتان و بتنێ هنده‌ك جاان دچمه شه‌ڤبێری و رونشتنێن تایبه‌ت، مخابن هه‌تا نوكه هونه‌رمه‌ند ب كارێ خوه یێ هونه‌ری ناژیت، له‌ورا ئه‌ز ژی ژبلی سترانگۆتنێ كارێ كاره‌بایی دكه‌م ل دهۆكێ، ل ڤێره ئه‌ز هنده‌ك سترانبێژێن فولكلۆری دنیاسم، ژوانا عابد دهۆكی و ژ سترانبێژێن كورد گه‌له‌ك داخبارێ هونه‌رمه‌ند ئه‌رده‌وان زاخۆیی مه و ژبه‌ری وی من ناڤێ كورێ خوه كریه (ئه‌رده‌وان) هه‌روه‌سا گه‌له‌ك حه‌ز ژ ده‌نگێ هونه‌رمه‌ند حه‌سه‌ن شه‌ریف و محه‌مه‌د پیرۆی دكه‌م، و نوكه ئه‌ز مژوولی كومكرن و ئه‌رشیفكرنا سترانێن فولكلۆری مه كو من ل به‌ره بكه‌مه پرتووك.
ناڤهاتی، ل سالا 1970 ل باژێرێ قامیشلۆ ل رۆژئاڤایێ كوردستانێ ژدایكبوویه، ل 2013 ژبه‌ر ره‌وشا ناله‌بارا وه‌لاتێ سوریێ ژ وه‌لاتێ ده‌ركه‌فتیه و نوكه ب خێزان ڤه ل دهۆكێ دژین.
