مۆزه‌خانا خوه یا مال ب چو مۆزه‌خانێن دی ناده‌ت
دهۆك، شاكر ئه‌تروشی:
سترانبێژێ مللی (عابد دهۆكی) د دیداره‌كێ دا بۆ رۆژناما ئه‌ڤرۆ گۆت: ژبلی سترانگۆتنێ ئه‌ڤه پتر ژ بیست سالانه كارێ من خرڤه‌كرنا كه‌رستێن فولكلۆری و تشتێ ئنتیكه‌یه، هه‌تا نوكه نێزیكی شه‌ش هزار پارچان من خرڤه‌كرینه و چار ژۆرێن مالا خوه داناینه، ئه‌ز ب دروستی نوزانم بهایێ هه‌موویان چه‌نده، به‌س ل گۆر ته‌خمینا من ژ ده‌ه ده‌فته‌رێن دۆلاری دبۆرن، چنكو ده‌سته‌كێ تزبیان د ناڤدا هه‌یه من ب پێنج هزار دۆلاران كڕی یه، هه‌روه‌سا مۆزه‌خانا خوه یا مال ب چو مۆزه‌خانێن دی ناده‌م.
زێده‌تر گۆت: كه‌رستێن من یێن فولكلۆری ژ هه‌موو تشتان پێك دهێن، وه‌ك سه‌راد و شال و داس و بڤر و گه‌له‌ك تشێن دی، هنده‌ك من ب پاره كرینه، هنده‌ك ژی ب دیاری بۆمن هاتینه، دیرۆكا پتریا وان بۆ به‌ری سه‌د سالان دزڤریت و هنده‌كان ژی ژیێ وان دگه‌هیته (150) سالان، هه‌روه‌سا من چه‌ندین جۆرێن چه‌كی وه‌ك ده‌بانجه و برنۆ هه‌نه، هنده‌ك ژوان یێن سالا (1900) نه، هه‌روه‌سا ده‌بانجه‌كا دی ل ده‌ف من هه‌یه یا به‌ری (205) سالانه ناڤێ وێ (فلین تلۆك) لێ ئه‌م ب كوردی دبێژینێ ره‌شۆكه، هه‌روه‌سا پارێ كاغه‌زێ و یێ ئاسنی یێن پتریا وه‌لاتێن جیهانی، ژوانا پارێ عیراقێ هه‌ر ژ سه‌رده‌مێ دامه‌زراندنا وێ هه‌تا نوكه ل گه‌ل هژماره‌كا زۆرا پیلان نوكه هه‌موو ل مالا من دپاراستینه، ل گه‌ل نێزیكی چار هزار كاسێتان كو یێن سترانبێژێن كوردن ل هه‌ر چار پارچێن كوردستانێ و چه‌ندین قاونان و گه‌له‌ك ستران ل ده‌ف من هه‌نه هه‌تا نوكه كێم كه‌سان یێ گوه لێبۆی.
ل دووماهیێ گۆت: هه‌كه پارێزگه‌رێ دهۆكێ هاریكاریا من بكه‌ت و جهه‌كی بۆ من دیاركه‌ن یێ حازرم هه‌موو تشێن خوه ببه‌مه وێرێ و ئه‌ڤه‌ژی بیته مۆزه‌خانه‌ك بۆ هه‌موو خه‌لكێ دهۆكێ، هه‌روه‌سا بۆ گه‌شتیاران ژی ده‌مێ سه‌ره‌دانا باژێرێ مه دكه‌ن.
