مۆزیكا كوردی پێشكەفتنەكا باش ب خوە ڤە دیتیە
سترانبێژ (رێزان شێروان) كو ژ باكورێ كوردستانێ یە، د دیدارەكێ دا بۆ رۆژناما ئەڤرۆ گۆت: هەتا نوكە من هژمارەكا كلیپان و سترانێن سینگل، ل گەل چەندین ئەلبۆمێن سترانان بەلاڤكرینە، هەروەسا پشتی دەمەكێ درێژ من ڤیا ئەز كلیپەكا نوو بەلاڤ بكەم، كو ئەو ژی سترانا كانیا چیایێ یا كەمالێ خانێ یە، ل گەل سترانا ئاخ لێ گولێ، كو سترانەكا فولكلۆرە، ب مۆزیكەكا نوو من چێكریە، پشتی بەلاڤكرنا ڤێ كلیپێ من چەندین كارێن دی یێن هونەری هەنە.
هەروەسا گۆت: ب دیتنا من نوكە مۆزیكا كوردی پێشكەفتنەكا باش ب خوەڤە دیتیە، بەلێ دڤێت مرۆڤ ل سەر بنگەهكێ باش مۆزیكا كوردی ئەنجام بدەت، ب تایبەتی ژی بۆ نڤشێن نوو، هەروەسا د نوكە دا ئەم دچینە ئاهەنگ و هەلكەفتێن كوردان ل باكورێ كوردستانێ و ل دەرڤەیی وەلاتی ژی، دیسان داخوازا من ئەوە ئەو گەنجێن دەنگخۆش، ل سەر بنگەهەكێ باش و تێر و تژی مۆزیكێ دروست بكەن و سترانان بێژن، مالباتا من ژی خزمەتەكا باش بۆ هونەرێ كوردی كریە و من ڤیایە ب رێیا سترانان خزمەتا هونەرێ كوردی بكەم.
