مۆزیكژەن و هونەرمەندێ دیارێ زاخۆ (عادل حاجی) وەغەركر
عەلی حاجی:
ل ئێڤاریا رۆژا دوشەمبی، رێكەفتی 17\3\2024 هونەرمەند و مۆزیكژەنێ دیارێ باژێرێ زاخۆ (عال حاجی) ژ ئەگەرێ نەخۆشیێ دناڤ ستودیۆیا خوە دا گیانێ خوە ژ دەست دا و لاشێ وی ل گۆڕستانا زاخۆ ڤەشارتن.
دلێر كامیران بەرپرسێ نڤێسینگەها زاخۆ یا سەندیكا هونەرمەندێن كوردستانێ بۆ رۆژناما ئەڤرۆ دیاركر كو هونەرمەند عادل حاجی ئێك ژ وان كەسان بوو یێ بەردەوام و هەتا دووماهی چركە د ژیانا خوە دا خزمەتا هونەرێ كوردی دكر و هونەرمەند و هونەر دوستێن هەرچار پارچەیێن كوردستانێ ل خوە كوم دكرن و ب رێیا ستودیۆیا خوە بەردەوام بێ بەرامبەر خزمەتا هونەرمەندان دكر و بێ جیاوازی ژی دەستێ وان كەسان دگرت یێن حەزا هونەری هەی و بەردەوام ژی رێك خوەشكەر بوو دا كو پتر پشتەڤانیێ ل وان كەسان بكەت و وەكو ماموستایەكێ بوو بۆ وان كەسان و چوونا وی خەمەكا گرانە بۆ هەموو هونەرمەندێن كوردستانێ و خەلكێ ئیدارەیا سەربەخویا زاخۆ و چوونا وی دێ ڤالاهیەكێ پەیدا كەت ب تایبەتی ژی د پشتەڤانیكرنا وان كەسان دا یێن حەزا هونەری هەی و عال حاجی خزمەتەكا ژ هەژی پێشكێشی هونەری ل زاخۆ و هەرێما كوردستانێ كریە و ژ هەژی رێزەكا مەزنە.
