مۆزیكێ ئەز گەهاندیمە گۆپیتكا خوەشیێن ژیانێ
ئەڤرۆ، هەرهین محەمەد:
هونەرمەندێ مۆزیكژەن (كوڤان عەبدولخالق) كو لێدەرێ ئامیرێ سازێ یە د دیدارەكێ دا بۆ بەرپەرێ هونەری یێ رۆژناما ئەڤرۆ گۆت: مۆزیكێ ئەز گەهاندیمە گۆپیتكا خوەشیێن ژیانێ و هەر دەمێ ئەز بێزاربوویم و هەروەسا بۆ گەلەك پێدڤیێن من یێن سەرەكی وەكو دەرون و گیان و دەربرین و خوەشیا ژ هەموو یان خوەشتر ئەوە دەمێ مرۆڤ خزمەتكارێ گەل و وەلاتێ خوە بیت دبیاڤەكی دا، لەورا بەری كو ئەز مۆزیكێ ب هەلبژێرم ئەز هونەری د دانم پارچەك ژ لەشێ خوە و مۆزیك خوارنەكە و هەست و گیانێ مرۆڤی پێكڤە گرێدەت و كارتێكرنەكا ئێكسەر یا هەی ل سەر هزر و دەرونێ مرۆڤی و دكەڤنترین چاخ دا مرۆڤان حەز ژ دەنگێن خوەش كریە و دشێم بێژم و ئەڤ چەندە دناخێ هەر مرۆڤەكی دا یێ چاندی یە و دیسان مۆزیك بەری پرۆسەكا هونەری بیت زانستە و پێدڤیەكا سەرەكی یە د ژیانا هەر كەسەكی دا و هەروەسا مۆزیك پشكەكا سەرەكی ژ هونەری پرۆسەكا بەردەوامە و رۆژانە دپێشڤەچوونێ دایە، لەورا ب شانازی ڤە دبێژم مۆزیكێ دایمە نیاسین و رێزدایە من ب تایبەت ل ناڤەراستا سالا 2000 ئەز شیایم ل ئەوی سەردەمی رولەكێ كاریگەر ب گێرم و پتریا هونەرمەندێن كورد ل هەر چار پارچان من ل گەل كاركریە وەكو هونەرێ مۆزیكێ و هەموویان ژی ب گیان و كەیفەكا زێدە دا من ل گەل ئەوان دەربازكریە، بەلێ شێوازێ هونەرمەند ئارام تیگران حەزەك ل دەڤ من پەیداكر و هەموو حەز و ڤیانا من ئەو بۆ مۆزیكێ ل گەل ئەوی ب ژەنم، بەلێ قەدەرێ نەكرە نەسیب وەغەركر.
كوڤانی گۆت ژی بۆ هندەك كارێن خوە یێن دەستپێكی یێ پەشێمانم و دەمێ نوكە ئەز دبینم دبێژم خوەزی دەم زڤری با ڤە دا كو من ئەو كارە نەكربا و مۆزیكژەن یێ پێدڤی یە بۆ دەمێ چەندین دەمژمێران رۆژانە مۆزیكێ ب ژەنیت وەكو راهێنان، بەلێ كاودانێن ئەڤرۆ و جیهانا سەردەم مرۆڤی نەچار دكەت سستیەك پەیدا بیت، بەلێ هەر دبێژم هندی من دەم هەبیت ب شەڤ دێ مۆزیكێ ژەنم ژ بەر كو ئارامیا گیانی یە و راهێنانە بۆ من و دیسان د دەمەكی دا ئەز لێدەرێ ئامیرێن هەوایی بووم وەكو نای و بالەبان و گەلەك ئامیرێن دی یێن هەوایی و بتنێ ئەز بووم ئێكانەبووم بۆ دەمێ چەند سالان من ئەڤ ئامیرە دژەنین و هەتا رادەكی شیام ناڤەكی بۆ خوە دروست بكەم ل دهۆكێ و دەوروبەرا و ل گەل ئەوێ چەندێ مە مۆزیكژەن گەلەك ئامیران ب ژەنیت ژ بەر كو پتریا ئامیران تەمانكەرێن ئێكن، بەلێ یا گرنگ ئەوە وەكو بسپوری مرۆڤی ئامیرێ خوە یێ سەرەكی هەبیت.
ل دووماهیێ ئەو چەندە ژی گۆت: تیڤێن مە وەكو دهۆك تیڤی و كوردستان تیڤی چو جاران خەمساری نەكریە و هەردەم وەكو دو قوتابخانێن مەزن بووینە بۆ پێگەهاندنا هونەرمەندان و دیسان بۆ بلند كرنا ئاستێ بزاڤا هونەری ل دەڤەرێ، بەلێ بتنێ داخازیا من ژ تیڤی و سەندیكا هونەرمەندا ئەوە زێدەتر چاڤدێری ل سەر ئەوان بەرهەمێن دهێنە بەلاڤكرن هەبیت.
