میران کەریم بۆ زێرەڤانی: وه‌رزش ب ڤى ره‌نگى نينه
ئەڤرۆ:
پشتی بەلاڤبوونا دەنگوباسێ دوورخستنا ھێرشبەرێ یانا زێرەڤانی میران کەریم لدووڤ داخوازیا راھێنەرێ تیمێ، یاریکەرێ ناڤبری ھاتە دەنگ و د دیدارەکا تایبەت دا بو رۆژناما ئەڤرۆ گوت: بەری قوناغا ئێکێ یا خولێ ب دووماھی بھێت من داخوازا دەستبەردانێ ژ راھێنەرێ تیمێ کر بوو و من بو دیارکر بوو من حەزا یاریکرنێ نینە ل یانا زێرەڤانی چونکو ئەو ھزرا من بو زێرەڤانی دکر ب ھیچ رەنگەکی وەسا نە دەرکەفت، لێ راھێنەر رازینەبوو دەستبەردانا من بدەت و گوتە من ل مال ب رینەخار، لەورا نەچاربووم جارەکا دی ب زڤرمە تیمێ لێ پشتی ھاتیم سەرەردەریا راھێنەری ل گەل من ھاتە گوھورین و دەلیڤا یاریکرنێ نە دا من و من گەلەک جارا د گوتە ھەڤالێن خوە دڤان دو حەفتیان دا دێ من دوورئێخن.
زێدەتر ناڤبری گوت: کارگێریێ پەیوەندی بمن کر و بومن دیارکر کو راھێنەرێ مفای ژ شیانێت من نابینت و من ژی بو دیارکر کو نە پێدڤی وێ چەندێ مە ئاستێ من ب ھەلسەنگینیت چونکو ل کوردستان و عیراق و ھەتا ئاسیا ھەمی دزانن میران کیە و ئەو کینە.
د درێژاھیا گوتنێت خوە دا میرانی ئەو چەندە ژی دیارکر ئێک ژ راگەھاندکارێن تیمێ ئەو چەندە پێ گوتبو ھەکە حەزا یاریکرنێ ھەبیت د شیاندایە بگەھنە رێککەفتنێ، لێ میرانی ئەف چەندە رەتکر.
ل دووماھیێ ناڤبری گوت: راھێنەرێ تیمێ دڤیا وەکو تولڤەکرنەکێ ل گەل من بکەت و شیا ئارمانجا خوە ب جە بینت، لێ وەرزش بڤی رەنگی نینە و وەرزش گەلەک ژڤان رەفتارا یا دوورە و ھەکە زێرەڤانی خوە ب یانکا مەزن و قارەمان دبینیت ھەر دەمێ زانی مفای ژ یاریکەرەکی ناوەرگرن بلا لدەمێ ڤەگوھاستنا دووربێخن نەکو پشتی ھەمی دەرگەە دھێنە گرتن و یاریکەر بێ یانە بمینیت.
