میسیێ بەغدا دو خەلات ل فلمە فەستیڤالا ئێكێ یا نێڤدەولەتی یا بەغدا وەرگرتن
فلمێ میسیێ بەغدا، كو ژدەرهێنانا دەرهێنەرێ كورد، سەهیم عومەر خەلیفەیە، دو خەلات ل گەڕا ئێكێ یا فلمە فەستیڤالا نێڤدەولەتی یا بەغدا ب دەستڤەئینان، ئەو ژی خەلاتێ باشترین ئەكتەرا ژن و خەلاتێ تایبەت یێ لژنا دادوەری بوو، د دیداەركێ دا سەهیم عومەر خەلیفە بۆ رۆژناما ئەڤرۆ دبێژیت: فلمێ سینەمایی میسیێ بەغدا، شییا دو خەلاتان ل فلمە فەستیڤالا نێڤدەولەتی یا ئێكێ یا بەغدا ب دەستڤەببینیت، ئەو ژی خەلاتێ باشترین ئەكتەرا ژن بۆ زەهرا غەندور و خەلاتێ تایبەت یێ لژنا دادوەری یا فەستەڤالێ بوو.
ناڤهاتی گۆت: ئەڤ سالە فلمە فەستەڤالا ئێكێ یا نێڤدەولەتی یا بەغدا ب ناڤێ محەمەد شوكری جەمیل، دەرهینەرێ عێراقی ل بەغدا هاتەكرن و ئەم شیاین دو خەلاتان وەربگرین، هەروەسا ل هەیڤێن دووماهییێ یێن پار فلمێ میسیێ بەغدا سێ خەلاتێن سەرەكی ل گەڕا 26 ێ یا فلمە فەستیڤالا نێڤدەولەتی یا فلمێن ئارپا ل هۆلیوودێ ل ئەمریكا وەرگرتن، كو ئەو ژی باشترین فلم و باشترین دەرهێنان و باشترین سیناریۆ، د هەمان سالدا، چەندین خەلاتێن دی یێن جیهانی وەرگرتینە.
سەهیم عومەری دیاركر ژی: هێندریك ڤێرتە ب رێیا كۆمپانیا ئەی تیم پرۆدەكشن ل بەلجیكا، محەمەد ئەكتاش ب رێیا كۆمپانیا میتۆس فلم ل ئەلمانیا و هۆلەندا د بەرهەمئینانا ڤی فلمی دا پشكدارن، هەروەسا كۆمپانیا وایلد بۆنج كو ئێكە ژ بهێزترین كۆمپانیێن بەلاڤكرنا فلمان ل ئورۆپا ئەركێ بەلاڤكرنا ڤی فلمی ب ستوویێ خۆڤە گرتییە، كورتە فلمێ مێسیێ بەغدا هەتاكو نوكە 60 خەلاتێن جیهانی وەرگرتینە، ل سالا 2022 ێ وەكو فلمەكێ سینەمایی هاتیە بەرهەمئینان و كارێ وێنەكرنا وی فلمی ل عێراقێ و هەرێما كوردستانێ هاتییە كرن.
