میقداد رەعدی: دێ بزاڤێ كەین دیرۆكەكا نوو بۆ لاوان تۆماربكەین
چاڤەڕێ دهێتە كرن ئەڤرۆ هەڤڕكیێن دووماهییا قارەمانییا ئیراقێ یا باسكێت بۆلێ ل سەر ئاستێ لاوان ل پارێزگەها دهۆكێ بهێتە كرن، ئەوا بڕیارە ب پشكدارییا حەفت یانەیان هۆلا گرتییا یانەیا دهۆك مێڤاندارییا وێ بكەت.
د. خالد نەجم سكرتێرێ فیدراسیۆنا باسكێت بۆلا ئیراقێ بۆ رۆژنامەیا ئەڤرۆ گۆت: ل سەر داخوازییا یانەیا دهۆك بڕیارە ئەڤرۆ مێڤاندارییا یاریین دووماهییا قارەمانییا لاوان ل هۆلا گرتییا یانەیا دهۆكێ بهێتە كرن، پشتی د ڤاڤارتنێن هەرچار كۆمێن دەڤەرێن جودا یێن ئیراقێ ب دووماهی هاتین حەفت یانە دێ پشكداربن ئەو ژی، دهۆك، دەربەندیخان، ئەلەحرار، ئەلفورات، ئەلموستەقبل ئەلموشرق، ئەلتەزامن و ئەلدیوانییە.
هەروەسان ناڤهاتی گۆت: كەیفخوەشین دۆبارە یانەیا دهۆك ڤەدگەڕێتە د ناڤ چالاكیێن باسكێت بۆلا ئیراقێ دا و گۆت: دهۆكێ سەنگا خوە یا د ناڤ خولێ دا هەیی چو ل سەر ئاستێ مێڤانداریكرنێ یان ژی پشكدارییان، ب هیڤی نە وەرزێ بهێت د ناڤ خولا پێشكەفتیان ب هێز ببینن و گەشبینم قارەمانییا لاوان ل دهۆكێ دێ یا سەركەفتی بیت ژبەركو خالێن سەركەفتنی ل پارێزگەهێ بەرهەڤن.
ژلایێ خوەڤە میقداد رەعدی راهێنەرێ تیما دهۆكێ گۆت: بەرهەڤیێن مە د بەردەوامن بۆ قارەمانیێ ژی ئەم رژدین نە بتنێ وەكو تیمەكا پشكدار بەلكو ئارمانج و هیڤیێن مە ناسناڤێ قارەمانیێ نە، سەرباری ئەركێ مە ب سانەهی نینە لێ دەستان ژ هیڤی و ئارمانجێن خوە نا بەردەین و شەڕی بۆ ناسناڤی كەین و دێ بزاڤێ كەین دیرۆكەكا نوو ل سەر ئاستێ لاوان تۆماربكەین.
