میلیشیایێن ب سەر ئیرانێ ڤە سامانێ ئیراقێ تالان دكەن و رێگریێ ل گەشەپێدانا وەلاتی دكەن
د چارچۆڤەیێ بزاڤێن دیپلۆماسی بۆ ب هێزكرنا دەولەتێ و چەسپاندنا قانوونێ، پرسا میلیشیێن چەكدارێن ئیراقی دبیتە رۆژەڤا سەرەكی یا كۆمبوونێن بلند یێن ئەمریكا ل بەغدایێ. د نووترین كۆمبووندا، واشنتۆنێ پەیامەكا توند و راشكاوانە ئاراستەی ئالیێن پەیوەندیدار كر.
د دەنگوباسەكێ بالیۆزخانەیا ئەمریكا ل بەغدایێ دا بەلاڤبوویە، هاریس بوزیر، كاربرێڤەبرێ بالیۆزخانەیا ئەمریكا ل بەغدا، ل گەل خالد شوانی، وەزیرێ داد یێ ئیراقێ كۆمبوویە. د وێ كۆمبوونێدا دانوستاندنەكا چڕ دەربارەی پاراستنا سەروەرییا ئیراقێ، بەرهنگاربوونا تیرۆرێ و مسۆگەركرنا ئارامیێ ل دەڤەرێ هاتیە كرن.
تەوەرێ هەرە گرنگ یێ وێ كۆمبوونێ، دووپاتكرنا ئەمریكا بوو ل سەر پێدڤییەكا ب لەز، ئەوژی هەلوەشاندنا وان میلیشیایێن كو ژ ئالیێ ئیرانێ ڤە پشتەڤانی لێ دهێتە كرن، كاربڕێڤەبەرێ بالیۆزخانەیا ئەمریكا ب راشكاوی راگەهاند كو ئەو میلیشیایێن چەكدار بووینە ئەگەرێ سەرەكیێ تێكدانا سەروەرییا ئیراقێ و گەفەكا بەردەوامن ل سەر ژیانا وەلاتیێن ئیراقی و ئەمریكی. هەروەسا ئاماژە ب وێ چەندێ ژی كربوو كو ئەو میلیشیایە سامان و ژێدەرێن نیشتمانی یێن ئیراقێ تالان دكەن و رێگریێ ل گەشەپێدانا وەلاتی دكەن.
ئەمریكا دووپات دكەت، كو دێ بەردەوام بیت د بلندكرنا دەنگێ خوە دژی هەر هێزەكا دەرەكی یان گرۆپەكا نە قانوونی كو دخوازیت ئیراقێ بكەتە مەیدانا ململانێ و لاوازكرنا دەزگەهێن دەولەتێ. ئەڤ هەلوەستێ نوو وەك ئاماژەیەك بۆ قووناغەكا نوو یا سەرەدەریكرنێ ل گەل دۆسێیا ئەمنی و سەروەرییا ئیراقێ دهێتە هەژمارتن، كو دەمەكە پەیام ژ ئالیێ ئەمریكا ڤە بەردەوام دهێتە دوبارەكرن.
