مین هه‌لگر دێ پشكداریێ د فیسته‌ڤاله‌كا جیهانیدا كه‌ت
ئه‌ڤرۆ نیۆز ، زنار تۆڤى:
فلمێ دكیۆمێنتارى یێ كوردى”مین هه‌لگر” كو ژ ده‌رهێنانا هه‌ردو گه‌نجێن كورێن باژێرێ دهۆكێ هۆگر هرۆرى شینوار كه‌مال یه،د ڤێ هه‌یڤێ دا ئه‌ڤ فلمه دێ چیته فیسته‌ڤاله‌كا جیهانى ل وه‌لاتێ سوێد،دڤى واریدا ده‌رهێنه‌ر شینوار كه‌مال بۆ ئه‌ڤرۆ نیوز دیاركر:فلمێ”مین هه‌لگر” د 41 مین فیسته‌ڤالا یوتۆبۆرى ل وه‌لاتێ سوێد هاتیه وه‌رگرتن و بریاره ل 26/1/2018 ئه‌ڤ فلمه بهێته نیشاندان و دیسا دوێ فیسته‌ڤالا جیهانیدا دا فلمێ مه دێ هه‌ڤركیێ ل سه‌ر خه‌لاتێ دراگۆن كه‌ت.
ناڤهاتى گوت ژى:عه‌قید فاخر به‌روارى قاره‌مانێ ڤى فلمێ دكیۆمێنتارى یه و ئه‌ڤ فلمه به‌حسێ قاره‌مانى و ئازایه‌تیا عه‌قید فاخرى دكه‌ت،كو وه‌ك پێشمه‌رگه‌یه‌ك گیانێ خوه د ئێخیته د مه‌ترسیێ دا و مین و ته‌قه‌مه‌نیان ل به‌راهیێن شه‌رى رادكه‌ت،ب مه‌ره‌ما هندێ كو هه‌ڤالێن خوه ژ مرنێ رزگار بكه‌ت و دیسا عه‌قید فاخر چه‌ندین جاران ژ مرنێ رزگار دبیت و پێیه‌كێ خوه ژى ژ ده‌ست دده‌ت.
شینوارى دیاركر ژى:دڤى فلمى دا عه‌قید فاخر چیرۆكا 14 سالێن قاره‌مانیا خوه وه‌ك مین هه‌لگره‌ك ڤه‌دگێریت،هه‌روه‌سا ئه‌ڤ فلمه د چارچۆڤێ فیسته‌ڤالا نێڤده‌وله‌تى یا فلمێن دكیۆمێنتارى ل ئه‌مسته‌ردام ل پایته‌ختێ هۆله‌ندا هاتیه نیشاندان و ژ سه‌رجه‌مێ 280 فلمان ب تنێ 15 فلم دوێ فیسته‌ڤالێدا هاتبوونه هه‌لبژارتن و د وێ فیسته‌ڤالێدا فلمێ مه خه‌لاتێ دادوه‌رى وه‌رگرتیه،ده‌رهێنه‌ر شینوار كه‌مال دبێژیت ژى:ئه‌ڤ فلمه ژ ده‌رهێنانا من و هۆگر هرۆریه و به‌رهه‌مێ وه‌لاتێ سوێده و بریاره د چه‌ندین فیسته‌ڤالێن دیتر یێن جیهانیدا بهێته وه‌رگرتن و نیشاندان.
