مێسی و ئه‌لێكسیا باشترین یاریزانێن جیهانێ هاتنه خه‌لاتكرن
ئه‌ڤرۆ
بۆ جارا حه‌فتێ د دیرووكا خوه دا ستێرا ته‌پا پێی یێ ئه‌رجه‌نتینی و یانا پاریس سانجێرمان یا فره‌نسی لیونێل مێسی وه‌كو باشترین یاریزانێ جیهانێ بۆ سالا 2021 ب ته‌پا زێری هاته خه‌لاتكرن، ئه‌وا سالانه ژلایێ گۆڤارا فرانس فۆتبۆل یا فره‌نسی ل پاریسا پایته‌خت هه‌ر ژ سالا 1956ێ دهێته دابه‌شكرن.
مێسی شاهێ ته‌پا پێی
لیونێل مێسی ب 613 خالان رێزا ئێكێ هات بۆ خودانێ ته‌پا زێری و پێشكه‌فت ل سه‌ر هه‌ڤڕكێ خوه یێ پۆله‌ندی و یانا بایرن میونخ یا ئه‌لمانی رۆبێرت لیڤانددوڤێسكی ئه‌وێ 580 خال كۆمكرین و رێزا دویێ هاتی، جورجینیۆ یێ ئیتالی و یانا چێلسی یا ئنگلێزی رێزا سێیێ هات ب 460 خالان، مێسی ل سالێن 2009- 2010- 2011- 2012- 2015 – 2019 ل گه‌ل 2021 خه‌لاتێ ته‌پا زێری.
لیڤاندۆڤێسكی باشترین هێرشبه‌ر.
خه‌لاتێ باشترین هێرشبه‌رێ سالێ بۆ ستێرا پۆله‌ندی و یانا بایرن میونخ یا ئه‌لمانی روبێرت لیڤاندوڤێسكی هاته پێشكێشكرن،ئه‌وێ ل وه‌رزێ بوری شیایی 41 گۆلان د خولا ئه‌لمانیا دا تۆماربكه‌ت و ئاسته‌كێ مه‌زن د خولا ئه‌لمانیا و چامپیۆنز لیگێ دا نیشان بده‌ت.
ئه‌لێكسیا باشترین یاریزانا كچ.
ستێرا ئسپانیا و یانا به‌رشه‌لۆنا ئه‌لێكسیا بۆتیاس خه‌لاتێ باشترین یاریزانا كچ وه‌رگرت پشتی پێشكه‌فتی ل سه‌ر هه‌ڤڕكێن خوه ساندرا بانیۆس و جێنیڤێر ئیرمۆسۆ، لسالا 2019 ئێكه‌م خه‌لات بۆ باشترین یاریزانا كچ هاتیه دان یا ئه‌مریكا میگان رابینۆ بوو، ل وه‌رزێ بوری ژبه‌ر په‌تایا كۆرۆنایێ نه هاتبوو ئه‌نجامدان.
بێدری باشترین یاریزانێ گه‌نج.
یاریزانێ هه‌لبژارتیێ ئسپانیا و یانا به‌رشه‌لۆنا بێدری گۆنزالێس خه‌لاتێ باشترین یاریزانێ گه‌نج ب ده‌ستڤه ئینا و پێشكه‌ڤت ل سه‌ر یێ فره‌نسی و یاریزانێ ریال مه‌درید ئێدواردۆ كاماڤینگا و ماسۆن كرینوود هێرشبه‌رێ مانچسته‌ر یۆنایتد یا ئنگلێزی، بێدرێ شیا زێده‌تری خالان كۆمبكه‌ت ژبه‌ر پشكداریێن وی یێن سه‌ركه‌فتی ل گه‌ل هه‌لبژارتیێ ئسپانیا د یۆرۆیا 2020 و ئۆلۆمپیادا تۆكیۆ.
دونارۆما باشترین گۆلپارێز.
گۆلپارێزێ هه‌لبژارتیێ ئیتالیا و یانا پاریس سانجێرمان یا فره‌نسی جیانلۆجی دونارۆما وه‌كو باشترین گۆلپارێز هاته ده‌ستنیشانكرن و خه‌لاتێ یاچین یێ تایبه‌ت ب باشترین گۆلپارێز وه‌رگرتن و پێشكه‌فت لسه‌ر هه‌ڤڕكێن خوه یێ به‌رازیلی و یانامانچسته‌ر ستی ئێدرسۆن، یێ كۆستاریكی و پاریس سانجێرمان كیلۆر ناڤاسی.
چێلسی خه‌لاتێ باشترین یانه ب ده‌ستڤه ئینا.
یانا چێلسی یا ئنگلێزی خه‌لاتێ باشترین یانه ل سه‌ر ئاستێ جیهانێ بۆ هه‌ردو وه‌رزێن 2020-2021 ب ده‌ستڤه ئینا پشتی ئه‌وان ده‌ستكه‌فت و ناسناڤێن وێ یێن نافخۆ و ده‌رڤه‌یی وه‌لاتێ خوه، چێلسی شیابوو ناسناڤێ چامپیۆنزێ ل وه‌رزێ بوری ب ده‌ستڤه بینت، دیسان قاره‌مانا سۆپه‌را ئۆرۆپا بوو ب سه‌ركه‌ڤیت ب لێدانێن سزایی ل سه‌ر ڤیاریالا ئسپانیا و د نۆكه‌دا سه‌رێ لیستا خولا ئنگلێزی دهێت.
بۆ زانین ئه‌ڤ خه‌لاته سالانه ژلایێ گۆڤارا فرانس فۆتبۆل یا فره‌نسی ڤه دهێته به‌لاڤكرن و تێدا 173 رۆژنامه‌ڤانێن وه‌رزشی ل جیهانێ دهێنه داخازكرن بۆ ده‌نگدانێ كو هه‌ر رۆژنامه‌ڤانه‌ك دێ سێ یایزانا د لیستا 30 یێن ژێ گرتی ده‌ستنیشانكه‌ت، هه‌ر یاریزانه‌كێ رێزا ئێكێ بهێت ئه‌وێن لیستا رۆژنامه‌ڤانی دا پێنچ خالان وه‌رگریت و یێ دویێ سێ خالن و یێ سێیێ خاله‌كه، ل سالا بوری ژبه‌ر په‌تایا كورۆنایێ نه هاتبوو ئه‌نجامدان، لیونێل مێسی زێده‌تر هه‌موویان ده‌ستڤه ئینایه ئه‌وژی حه‌فت جاران، دووڤدا كریستیانۆ رۆنالدۆ پێنچ جاران، یاریزانێن سێ جاران ب ده‌ستڤه ئیناین، یۆهان كرۆیڤ، مێشیل پلاتینی و ماركۆ ڤان باستن، 34 یاریزانان ئێك جار خه‌لات ب ده‌ستخوه‌ڤه ئینایه.
